الجمعة، 29 فبراير 2008

عندما ذهب اليقين

عندما ذهب اليقين ...
لم أدر الى أين ارتحل ...
ألقيت قلبى فى الوحل ...
عندها بدأ الحنين ...
و اهتز قلبى فى وجل ...
و سرحت فى شعر الغزل ...
اه يا قلبى ما العمل ...
والشبل فى جوف العرين ...
*****
عندما ذهب اليقين ...
أحسست بحلمى وقد ضاع ...
و رثيتك قلبى الملتاع ...
فلأبحر من دون شراع ...
و لأبقى فى التيه سنين ...
احساس الغدر وقد شاع ...
فى قلبى من دون قناع ...
قد صنع من الحب قلاع ...
يرهبها القلب المسكين ...
*****
عندما ذهب اليقين ...
استشعرت دماء سالت ...
من جرح كرامة قد زالت ...
أفكار سوداء جالت ...
فى عقلى فسمعت أنين ...
و مشاعر قاسية هالت ...
أتربة فى القلب ومالت ...
تطعن احساسى ولا زالت ...
تقتلنى و أرجوها اللين ...

الثلاثاء، 19 فبراير 2008

الحزب الوطنى فى مصلحتك !!


الحزب الوطنى فى مصلحتك والمستقبل ليك
حريصين يا مواطن على راحتك وعلى مزاج معاليك
بس انت تصهين وتطنش وتخليها عليك
متصدقش جرايد غيرنا لحسن يسرحو بيك
دول ناس مش حابينك خالص ودى كلها تلاكيك
يا مواطن خليك ويانا الهى ربنا يهديك

الحزب الوطنى فى مصلحتك والمستقبل ليك
لجنة سياساته يا جمالها لجنة لذيذه وشيك
اوعاك تسأل عن لزمتها وفى حالك خليك
لو عاوز تنضم تعالى وهنعرف نحميك
هننسيك العيش الناشف والناس الصعاليك
وتدوق بقى م التوست بتاعنا وحمامنا أبو فريك

الحزب الوطنى فى مصلحتك والمستقبل ليك
مش عندنا لا فساد ولا سرقة ولا رشاوى وتسليك
ولا عز دخيله فى حديدها مالهاش اى شريك
ولا أكياس الدم دى بايظه وبلاش بقى تشكيك
والناس مبسوطه ولو كنت مكدبنا نوريك
وبلدنا نضيفه ومغسوله بصابونتين وفنيك
ده الحزب الوطنى فى مصلحتك والمستقبل ليك

الأربعاء، 13 فبراير 2008

عن الحب فى عيد الحب


لا أعلم يقينا متى بدأ حبها يعتمل فى قلبى ...
ربما بدأت أحبها حين أدركت كيانى و أدركت كيانها ...
ربما أول أن رأت عيناى الدنيا ... وربما حتى قبل أن أولد ...
ولا أعلم أيضا يقينا لماذا أحببتها ...
أ أحببتها لأنها فى بعض الأحيان كانت تعطيني كل ما أحتاجه من احساس بالدفء والأمان والحب ...
اذن لماذا أحببتها أيضا حينما كانت تبخل على بكل شىء ... حتى بواجباتها المفترضة نحوى ...
لا أدرى ... ولكنى متأكد من شىء واحد ... أننى ذبت فيها عشقا و حتى النخاع ...
أحيانا كنت أشعر أنها تحبنى أضعاف حبى لها ... وكثيرا ما كنت أشعر أنها لا تبادلنى أدنى شعور بالحب ...
أذكر فى تلك الفترة السوداء عندما زاد بيننا الجفاء ... شعرت بأنها لا تطيق مجرد بقائى معها ...
هى أيضا لم تعطنى أى فرصة أرى من خلالها امكانية قبول البقاء والاستمرار معها ...
وفى نهاية الأمر ... طردتنى ...
طردتنى من حياتها ومن مكانى داخل قلبها ...
لا أعلم حقا هل هى من طردتنى أم أنا من فررت من جفائها وقسوتها معى ...
كنت أعتقد أننى كرهتها ... كرهتها لأنها ظلمتنى ... لأنها لم تعطنى فرصة للبقاء معها وبدون سبب واضح ...
ولكنى كنت يوما بعد يوم أكتشف أنى لم أستطع أن اكرهها ...
بل والأدهى أننى لا زلت أحبها ... كانت هذه هى الحقيقة التى لم أندهش لها ...
هو داء القلب المزمن ... هو ألم النفس الممتع ...
اكتشفت أننى لا زلت أحبها حين كنت أبكى شوقا لها ...
حين كنت أغضب وأثور حين أسمع أى كلمة تقال عنها غير لائقة بها ...
حين كنت أرقص فرحا لسماع أى أخبار طيبة عنها ...
عشت كثيرا بعيدا عنها ... ولكنى الان _والان فقط_ أشعر أن قلبى يتمزق ...
لم أعد أحتمل ... أشعر برغبة عارمة فى العودة اليها ...
أعرف أنها بمجرد أن ترانى ستعانقنى فى حب ودفء برغم كل البعد والجفاء فى كل السنوات السابقة ...
مهما قست على أو ظلمتنى بعد ذلك ... سأرضى بذلك وأقبل ... فقد علمت أن نارها أفضل كثيرا من جنة غيرها ...
فلأبقى معها اذن الى الأبد ... فلأعيش معها ولأموت من أجل حبها ...
وبالفعل اتخذت القرار ... قرار عودتى اليها ...
عودتى الى مصر ...





الاثنين، 11 فبراير 2008

اشمعنا شمو نشادر ؟!!

ازيكم يا أحلى شباب فى الدنيا ... يا شباب مصر اللى على طول مظلومين ... الكبار شايفينكم تافهين ... والصغيرين شايفينكم على طول متنرفزين ... والوزرا والمسئولين مش شايفينكم اصلا ...

انا بس حابب اعرفكم انا مين ... انا يا جدعان اسمى أسامة ... أسامة أمين ... شاب غلبان زى حالاتكم كده ... لقيت فى دماغى كلام كتير مصدعنى و لقيت زورى بيوجعنى من كتر الزعيق ومحدش بيسمعنى فقلت اكتبه فى مدونه احسن واصدع ناس تانيين معايا ... معلش بقى نصيبكو كده ...

و انا بعمل المدونة لقيتهم بيقولولى اختارلها اسم ... قعدت افكر افكر وقلت لنفسى هتسميها ايه يا واد يا أسااااامة ... جه على دماغى الاسم اللى انتو شايفينه فوق ده ... شمو نشادر ...

اه فعلا ... انا أصلى ناوى اشم نشادر واشممكم معايا ... انتو عارفين لما بيبقى واحد مغمى عليه او مش فايق بنشممه نشادر عشان يفوق ... انا خدت بالى ان المجتمع كله محتاج يشم نشادر وانا كمان ... فقلت احاول اشمم اى حد يدخل هنا بقى نشادر ... ذوق عافية هتشم !!!

فربنا بقى يسهل والمدونة تعجبكم و تحبوها كده وتقولولى على طول تعليقاتكم وارائكم عاللى بكتبه عشان اشوف النشادر جايبه نتيجه ولا لأ ...

استرها معانا يا رب !!!