كنت مستيقظا فى تلك الساعة المبكرة من صباح ذلك اليوم أتابع التلفاز .. عندما بدأ " لحسن حظى طبعا " البرنامج العبقرى (صباح الخير) فى القناة الاولى على التليفزيون المصرى .. ولشدة ندمى قررت مشاهدة أجزاء منه .. يعنى قلت اشوف الناس دول عايزين يوصلولنا ايه برده .. وفور انتهاء تتر البرنامج طالعنا على الشاشة وجه المذيعة وقد ملأته ابتسامة مشرقة .. وتلاعبت فى عينيها نظرة ضحوك متفائلة .. ثم أعلنت وبقلب جامد : " يا جماعة .. مصر لسه بخير !! " .. وأكملت : " لسه الامانى ممكنة .. حتى مع ارتفاع الأسعار كل يوم عن التانى ومع ازدياد معدلات البطالة ومع تدهور مستوى الصحة والتعليم .. لسه فى أمل !! " ...
لا شعوريا انتقل لى جزء من تفاؤلها وقررت اركز بكل حواسى فى شاشة التليفزيون منتظرا سماع هذا الخبر الذى أشاع كل هذا الأمل والتفاؤل فى نفس هذه المذيعة ومن حولها فى الاستوديو .. متوقعا خبر مثل : ( استقالة حكومة نظيف ) أو ( مبارك يقيل حكومة نظيف نظرا لتدهور الحالة الاقتصادية للبلاد والاجتماعية لمواطنى البلاد ) أو ( الرئيس مبارك قرر التنحى عن حكم البلاد واقامة انتخابات حرة نزيهه ) أو ( السر الالهى طلع !! ) .. ما انا قلت مش معقول يعنى التفاؤل ده كله سببه خبر أقل من الاخبار دى فى الظروف المنيله بنيله اللى احنا عايشين فيها ...
ثم خابت كل امالى وانهارت كل احلامى حين سمعت الخبر : " سيدة مصرية اكتشفت ان معدل ذكاء طفلها الذى لم يتجاوز العاشرة تتعدى نسبة الذكاء الطبيعي !! " .. لا والله ؟!! .. بجد والنبى ؟!! هو ده الخبر اللى خلاكى تحلى كل مشاكل مصر وانتى قاعده كده .. لا فعلا
معاكى حق .. ده انا حتى اتبسطت خالص اهو .. نياهاهاهاهاهاهاااااااااا ...
أعلم تماما أن الخبر جيد برغم كل شيء .. طفل مصرى عبقرى .. شىء رائع وجميل ويدعو للتفاؤل حقا .. ولكن ألا تروا معى أن هناك بعض المبالغة فى أن نجعل اكتشاف مثل هذا الطفل هو حجة تريد بها الحكومة جعلنا ننسى كل اللى عايشين فيه من مصايب وبلاوى وفقر وقلة حيله ؟ .. أعتقد أن هذه هى المبالغة بعينها .. ان لم يكن استفزاز لعقلية المشاهد الغلبان الكادح الذى يفكر كيف سيكمل بقية الشهر والمرتب خلصان من يوم عشره .. تغييب لعقول المشاهدين ومحاولة ساذجة لتوجيه الرأى العام تجاه اى سراب يشع بالأمل فى سبيل افقاد المجتمع المنهك ذاكرته الملأى بالجروح والمعاناه ..
اعلام الحكومة أصبح يطبق حرفيا المثل القائل : " يعمل من الحبة قبة " ..أمن المفترض على الشاب خريج الجامعة العاطل الجالس ع القهوة أو المريض فى المستشفى الحكومى الذى لا يلقى اى نوع من الرعايه الصحيه الادميه أو الموظف الغلبان الكادح اللى واقف فى اتوبيس اربعتاشر رجليه مش لامسه ارضية الاتوبيس من الزحمة انهم اول ما يسمعو الخبر ده يرقصو طربا وفرحا بهذا الانجاز المصرى الفخيم ؟!! .. هيييييييييييييييه عندنا طفل معجزة .. كل مشاكلنا اتحلت يا رجاله ...
بالفعل هو خبر جميل .. ولكن فى بلد مثل مصر يصبح خبرا تراجيديا .. اذ يمكن بقليل من فراسة أن نتصور ما سيحدث لهذا الطفل وغيره الكثير من أطفال مصر الأذكياء .. كل يوم يمر على هذا الطفل فى المدرسة سوف يقلل من معدل ذكائه ويضع برأسه أفكارا بالية ومعلومات خاطئة عاف عليها الزمن .. كل دقيقة تمر عليه وهو يشاهد اعلام حكومته سوف تطفىء ضوئا فى عقله .. كل مشكلة مادية سوف تواجه والديه فى ظروف الغلاء التى نحياها سوف تكسر بداخله شعاع أمل لتخبو عبقريته يوما بعد يوم .. وليتحول الخبر الجميل الى حسرات غير معلنة !!
فى النهاية أريد القول بأنه من الافضل وضع الامور فى حجمها الطبيعي .. كفايه يا تليفزيون الحكومة وجرايدها ضحك ع الناس .. كفايه تضليل للرأى العام .. كفاية استفزاز للناس الغلابه .. اتقو الله فى دماغ الناس وفى طريقة مخاطبتهم عبر تليفزيونكم الملاكى .. وربنا يسترها ع الواد ويكفيه شر الحسد !!
.....................................
نشر فى جريدة الدستور .. نشر فى مجلة بص و طل الالكترونية .. http://www.boswtol.com/5gadd/nsahsah_226_05.html
الاشتراك في:
تعليقات الرسالة (Atom)
هناك 16 تعليقًا:
اولا انا مبسوطة انى اول حد يعلق على المقال وعاوزة اقولك انى بالرغم انى متفائلة بس مش بالطريقة دى انا معاك فى الكلام اللى انت قولتله احنا بنعمل من الحبة قبة زى ازمة عصام الحضرى اللى كانت حديث الاعلام الفترة اللى فاتت تفتح الحنفية تلاقى ازمة عصام الحضرى نازلة منها برضه بيلهوا الناس عصام جيه عصام راح ولا هتحل مشكلة من مشاكل البلد واعتقد لو كانوا اهتموا بازمة العيش وادوهوها نفس الوقت كان ممكن تتحل وربنا يوفقك وطبعا المقال عجبنى
ههههههههههههههههه!!!على فكرة من اول ما بدات اقرا مش قادرة امسك نفسى من الضحك صحيح جد مش عارفة باضحك على الكلام ولا على حالنا((مش بيقولوا فى المثل هم يبكى وهم يضحك ))اهو ده بقى ....ايوه كده رجعنا نفوق تانى اصلنا كنا بداءنا ننام ....مقال جميل بجد و ربنا يوفقك ...الا قولى عجبتنى قوى كلمة (السر الالهى طلع )ههههههههههانت كنت تقصد ايه ؟؟؟سلام ***اوركيدا***
اوعي وشك ياس ..ايه الكلام الجامد ده والله مقال زي الفل ايون كده النشادر ريحته فااااحت هع هع هع هع .بس كده بابا حسني يزعل منك ياس ومش هيديلك المصروف بتاع كل يوم وماما سوزي مش هتحميك بعد كده ..وف اخر التعليق احب
اشكر السيد الرئيس على مجهوداته العقيمه التي يبذلها من اجل شعبنا الجبيب شعب مصر ونشكر ماما سوزي على جهدها اامضني في سبيل العمليه التخريبيه من اجل السقوط بالمراه...وف النهايه اقول لكل شاب وكل فتاه ابدا ف الانتحار بس خليه من بلكونه الجيران عشان امك متلحقكش وست الحبايب ياحيببيه اسو
يوووه نسيت اكتب اسمي غلطه مطبعيه
Face OFF MsAaY7
يا عم أنا بحب مصر و يموت فى بابا حسنى . بس اللى انا زعلان منه أن سيرتى بقت على كل لسان . يعنى ماما كانت لازم تقول انها لقتنى عبقرى و تبلغ التلفزيون كمان .
بس بجد الله عليك يا واد يا أسامه . ربنا يسهل و أشوفك تانى بقا. مش هننساك متخافش .
صديقي اسامه :
هههههههههههههههههههههههههه
انت عارف انت زعلان ليه كده ؟
عشان انت معدل ذكاؤك - وكلنا طبعا معاك - اقل كتيييييير من الطفل ده .
لكن اللي غايظني بجد ان اهل الطفل رفضوا انه يروح اي دوله اجنبيه يتعلم فيها رغم انهم عارفين تماماان الطفل بكده حايفقد الميزه بتاعته وهي الذكاء عشان م الاخر اللي بياكل فول مش ممكن يفضل ذكي زي ماهو . صح ؟
وبعدين ربنا يحيينا لحد ما الطفل ده يتخرج كده م الجامعه ويلاقي شغل محترم ويعرف يحل مشاكل مصر واؤكد لسيادتك ان ده حايتم ف عهد الرئيس حسني مبارك برضه ماشاءالله يعني.
توبك جميل جدا يا اسامه وتسلم ايدك وميرسى يا جميل على مواضيع الحلوة مووووووووونى
يخرب عقلك ياد يا أس إيه الكلام الجامد ده والله بجد انت واد جامد ورافع راسنا لفوق فى السما بس بص حاسب على نفسك بأه اليومين دول زمنك متراقب مش بعيد يكون فى كاميرات فى الحمام (بيت الراحه)
واحد صاحبك
ايه الجمال ده والله ياريت منك اربعه والله كنا بقينا القوى العظمى ....عووووووووووو
احمد زكريا
بسم الله الرحمن الرحيم
جميل يا سمسم وبجد طول ما انتا صاحى هتلاقى الى يسمعك ويقدر فكرك موضوع جميل فيه فهم للأحداث.
ربنا يزيدك كمان وكمان ويوسع افكرك .
صديقك ATOUTE.
ايه يا اسامه الكلام الجامد ده ربنا يزيد ويبارك بس هوه السؤال هنا فى طفل كل شويه يجبوه ويقوله الطفل المعجزه هوه هوه نفس العيل ولا ايه اصل كده مصر هتبنى طموحتها على عيل واحد بس وشكله كمان طالع وواخد رشوه هههههههههههه
اسامه انا روناء اصل نسيت اكتب اسمى يلا عاوزين كمان موضوع طحن http://stopmoubark.blogspot.com/
أية ياواد يا أوسى الحقد دة هو انت مش عاحبك حاجة خااالص ف البلد ما تغيرها ياعم احسن اللة بقى هههههههههه بهزو طبعا الايلوب حميل واستمر يا اوسى
يا سمسم يا جامد بس بلاش السواد والحقد ده كله ع الواد حرام ده مهما كان برضه طفل برئ ــ مع انى اشك ف موضوع برئ ده ــ بس هو سؤال رفيع هى مامته عرفت ازاى ان مستوى ذكاءه اعلى من كل اللى ف سنه؟ سالها ف الفيزيا ؟؟!!!
معاك حق
مع اني معروف عني اني متفاله
بس انا استفزيت
عندك حق والله يا أس أس وفى امثال غير كده كتيييييييير زى ما كلنا عارفين بدون ذكر.........
بس اكيد خلاص بقى الكلام ده معروف انه تضليل عن كلام ومواضيع اكبر
والله اعلم الطفل ده ايه مصيره
وياترى من حسن حظه انه عبقرى ولا سؤ حظه.....والحدق يفهم
إرسال تعليق