انا عارف ان انا قليل الذوق اوى لانى اتأخرت كتير جدا على اجابات التاجات دى .. بس و الله يا جماعه غصب عنى مش بمزاجى .. و يا ريت مش تزعلو منى .. المره دى بقى جالى 4 تاجات مره واحده .. اربعه .. ده انا مكنتش مصدق نفسى لما جالى اول تاج .. انما واضح انها فتحت بقها !
هناخدهم بقى حسب ترتيب الاهدائات واحد واحد كده .. و يا رب تستحملونى عشان كلها اسئلة عن شخصيتي و حاجات كده برده .. أمرنا لله ..
أول تاج من صديقي و زميل على حريتنا عبد الله غنيم .. بشكره اوى و من تانى بعتذرله عشان هو اكتر واحد اتأخرت عليه .. الاسئلة اللى مع التاج كالتالى ..
هل سبق أن فكرت في أفعال مجنونة ؟
القريبين منى على المستوى الشخصى يعرفو كويس ان السؤال كان المفروض يكون ( هل سبق أن فكرت فى أفعال عاقلة ؟ ) ! .. عموما انا الطبيعي بتاعى ان افكارى بتبقى .. احم .. غريبه شويه ..
هل نفذت احد هذه الافعال ؟
ايون فى الغالب لما الواحد بتطق فى دماغه حاجه بيعملها .. و مش بيفكر كتير فى نتايجها حتى لو عارف ان نتايجها هتبقى سوده فوق دماغه ..
ما هو رد فعل من عرف بتلك الافعال ؟
و الله ناس كتير بتقعد تقوللى انت عبيط .. انت هتضيع نفسك .. يا ابني اعقل شويه .. حاجات كده يعنى ..
هل علم بها احد ؟
ايون ما كله بيبقى ع المكشوف .. احنا بتوع الشفافية !
ما هو احساسك بعد ان قمت بأحد الافعال المجنونه ؟
يعنى .. ساعات اندم .. ساعات اضحك .. حسب بقى اللى بيحصللى بعدها ..
هل ندمت على فعل جنوني قمت به كاد أن يودي بحياتك ؟
لا حكاية يودى بحياتى دى حصلت مره واحده بس مندمتش ولا حاجه .. قعدت اضحك بعدها .. انما انا ندمت على حاجات كتير عبيطه عملتها يعنى ..
هل سبق و وقفت أمام مرآة لتقول لنفسك أنك مجنون ؟
يااااااااه .. كتير جدا ..
كده التاج الاولانى اسئلته خلصت .. التاج التانى بقى كان من صديقي مراد ( ميرو ) صاحب مدونة من أجل البشرية المعذبة .. اسئلته صعبه اوى بس برده بشكره كتير و بعتذرله اوى عشان اتأخرت عليه كتير .. الاسئلة اهى ..
لو أعطيتك ثلاث وردات من هم الثلاث الأشخاص اللى هتهديهم الورد اللى معاك ؟
ههدى واحده لاختى العزيزة جدا جدا نودى .. و التانيه لدعاء عمرو ( يا رب حتى تكون جابتلى سبحه ! ) .. و التالته لدكتور احمد خالد توفيق ..
لو أعطيتك ورقة بيها 3 سطور وقلت لك أكتب فيهم اللى أنت عيزه هتكتب إيه ؟
هكتب : ( اللهم أحينى ما دامت الحياة خيرا لى .. و أمتنى ما دام الموت خيرا لى ) ..
ما هو هدفك فى الحياة ؟
ما انا لو قلت مش عارف هبقى انسان تافه بقى و ماليش هدف و عايش كده و بتاع .. بس انا فعلا مش عارف حاجه معينه .. بس اقدر اقول نفسى اعيش مبسوط و خلاص ..
إن شاء الله بكرة هيكون أحسن من النهارده .. هل تصدق هذه المقولة ؟ ولماذا ؟
ده يتوقف على حاجات كتير و ظروف كتير ممكن تتغير .. الله اعلم بقى هتتغير للاحسن ولا للاوحش .. بس انا مش متفائل ..
أجمل مقولة سمعتها فى حياتك ؟
لالا كده هظلم حاجات كتير اوى .. بس فى مقولات كتير اوى سمعتها او قريتها دخلت دماغى و بحبها جدا ..
من المغنى اللى بتحبه أوى و إيه أحلى أغنية ليه بتحبها ؟
محمد منير .. اغنيه واحده ؟ .. لا مقدرش .. منير له اغانى كتير جدا جامده ..
"غزة" تمثل لك إيه فى حياتك ؟
أعتقد ان غزة هى الجزء الأكبر مما تبقى من الكرامة العربية و الاسلامية ..
أعطى لانتمائك لوطنك درجة من مائة ؟
متهيألى مفيش حاجه اصلا اسمها درجه من100 للانتماء .. يعنى ايه دى ؟! .. اعتقد فى واحد بيحب بلده و واحد مبيحبهاش مع انى لسه مشفتش اللى مبيحبهاش ده و ان تظاهر بذلك ..
لو تزوجت و أنجبت بنتين و ولدين أى الأسماء تختار لهم ؟
الولدين .. مصطفى و عبد الرحمن .. البنتين .. مريم و ايمان ..
غشيت فى أمتحان و انت صغير ؟
أساسى يعنى .. و وانا كبير كمان .. اكدب يعنى ! ..
أساسى يعنى .. و وانا كبير كمان .. اكدب يعنى ! ..
لو أتعرض عليك رشوة كبيرة و انت فى زنقة ماليه هتعمل إيه ؟
فى كلمه قريتها و مش هنساها .. أكثر مخلوقات الله هشاشة هى الفضيلة التى لم تختبر بعد ! .. الطبيعي انى ارد دلوقتى و اقول اكيد مش هاخدها و المبادىء و القيم و و .. لكن وقت الاختبار العملى الحقيقي الله اعلم ايه اللى ممكن اعمله .. فاكيد بدعى ربنا يثبتنى فى الاوقات الصعبه .. ده اللى اقدر اقوله ..
قول 3 صفات ب 3 كلمات بس توصف بيهم شخصيتك ؟
متبرقل .. جرنشوف .. ليظوك ..
اول مرتب ليك وكان كبير يكفي تجيب اغلى هدايا هاتجيب لكل فرد في عيلتك ايه ؟
مش جايب انا حاجه لحد .. انا هدلع نفسى بقى ده اول مرتب ..
ايه المجال اللى غير دراستك و شايف نفسك فيه قوي ؟
انا نفسى اطلع حاجات كتير كده مع بعض .. يعنى مش مستعد اتنازل عن اى حاجه .. و انا عارف ان فى الاخر مش هعمل اى حاجه منهم اساسا .. مالها قعدة القهوة و الله زى الفل !
بتحب السفر؟
ايون بس لاماكن بحبها بقى .. مش السويس و الخنقة ..
طب دلوقتى حالا ايه المكان اللى نفسك تكون فيه ؟
نفسى اروح كوالالامبور جدا .. بيقولو جامده ..
ياااااااااه اخيرا الاسئلة خلصت .. انا ههدى التاجين دول بقى للعسوله برنسيس بيري و للعزيزة جدا انجى ابراهيم ..
التاج التالت بقى من بيري .. انا بشكرها اوى ع التاج بس هو اسئلته نفس اسئلة اول تاج جالى بتاع دعاء مواجهات اللى هو اتكلم عن نفسك و كده .. فاكيد مش هقول تانى عشان الناس كده هتضربنى ..
التاج الرابع من انجى ابراهيم .. بشكرها جدا جدا ع التاج بس هو برده اسئلته نفس اسئلة التاج التانى اللى جالى من دكتور هيما .. يلا بقى يا اوجى معلش هتكلفى نفسك و تنزلى تقرى الاجابات من تحت !
و اخيرا .. متشكر اوى ليكو كلكو يا جماعه انكم استحملتونى كل ده .. و بشكر تانى كل واحد دخل المدونه هنا و قرا كلمه فيها عجبته او معجبتوش .. و كل سنه وانتو طيبين كلكو .. باقى شهر و نص بس على رمضان .. مسلسلات بقى للصبح !
هناك 30 تعليقًا:
اول تعلييييييييييييييييييق يا لهوى يا اسو مش مصدقة نفسى ...... انا قريت اجابات التاج عندك قبل كدة بس الزهايمر يا اخويا بعيد عنك.....هييييييه يللا حسن الختام بس قوللى بقى ايه هى الافعال المجنونة.........تحفة الحتة بتاعة اوصف نفسك دى يا واد انت عسل والله
هههههههههههههههههه
عسل اه
3arf a7san 7aga fe rdodak eh? enak 2olt mosh ba7b esafar lel soes we el7tt el7'an2a de .da7'alt dma3'y walahy .bas bnsba lemaodo3 el 3'sh dah enta kda btsharad kol elly fe handst petrol m3ak,akeeed ana mosh ba3'sh wenta 3arf kda koes wala eeeeeeeeeeeh.we maodo3 el7agat elhabla elly enta bt3mlha .ana m3ak feha l2n elhabal dah n3ma mn 3and rabna ,we ba3den maodo3 enk tktb 7aga fe talat stooor ana fakrtak hatktb ana bamoooot fe tito bas enta tl3t nadl .koloh b7sabo .bas bardo el2s2la mosh fe elgon 2oy ,e7na 3ayzen as2la so7'na mn elly btdao7' mal7o2a ya man ,kfaya kda 3ashan ana t3bt mn elktaba . we msta7'sar eny astahlk elkeyboard fe eny aktblak ta3le2 .3am handast petrol /mohamed nabil tito
يا صباح الخيرات ... ازيك يا اسامة ... اخيرا افتكرت البلوج ... وليه الغيبة دى ؟؟!!... دا احنا حتى فى اجازة !!... ما علينا .
ما شاء الله كل دى تيجان !!... مبروك عليك .
على فكرة شكلك كده ضحكت علينا فى اجابة التيجان دى ؟؟
كنت اتمنى اعرفك اكتر من خلال اجاباتك... لكن واضح انك قاصد تكون غامض ولا ايه ؟؟؟
يعنى كنت اتمنى اعرف حتى لو واحد من الاعمال الجنونية اللى ممكن تكون فكرت تعملها فى يوم من الايام ؟
برضه اجمل مقولة سمعتها ؟؟... اوك فى كتييييير لكن ليه مش قلت مثل ؟؟
عجبنى قوووووى ردك على موضوع الرشوة .. فعلا ربنا يثبتك فى اوقات الاختبار الصعبة دى .
هههههههه حزر فزر ... وايه الصفات الجامدة دى بقى ؟؟؟؟... انجليزى ده يا مرسى , لالالالالالالالالا شكله هندى ؟!!
الصراحة انا ماليش فى كلام اليومين دول ... ارجوا الاستعانة بصديق للتوضيح هههههه.
وايه يا بنى الانانية دى ؟؟... الناس تربى و تتعب , وده يقولى اول مرتب اصرفه على نفسى بقى ؟!... يا سلام
تعرف !!... هتطلع فى دماغى اروح ازور السويس مخصوص علشان اعرف ايه مشكلتها معاك ؟؟
ههههههه ... بس خلاص كفايه كده
بجد يا اسامة كنت اتمنى اعرفك اكتر من ردودك على التاج ... لكن يلا بقى خيرها فى غيرها ... و الجيات اكتر ان شاء الله
ارق تحياتى ليك ... سلام
هسسسسسسسسس ..كله يسكت خالص ..
امتحااااااان ؟؟!!
بسم الله .. وما شاء الله .. نفتتح الاسئلة..
هات مرادفات الكلمات الاتية :-
1- متبرقل
2-جرنشوف
3-ليظوك
ههههههههه ابقى قابلنى لو عرفت الحل !!!
بجد ايه المصطلحات الغريبة دى ؟!... ومين هيحل لنا الشفرة دى بقى ؟؟!!
سلام يا جميل
جميل يا اسامة من اجاباتك شكلك كووول اوووي وفريش كده مش خنقة
بس بجد بجد لازم يكون في هدف قدامك واضح ويكون مش مستحيل يعني انما قريب ولو قدرت تحققه إن شاء الله حط هدف جديد قدامك علشان توصله وهكذا لان لو الدنيا سبهلله كده مش هنعمل حاجة في حياتنا وهنفضل مقضينها كده وخلاص
ملحوظة
مش معنى كلامي ده اني بعمل كده لا طبعا انما بقولك وخلاص ودي نصيحة ليك وليا ولأي حد يقراها .. ويمكن يجي الوقت اللي اقدر اعمل فيه كده بشكل منتظم
تحياتي
وليد
4 تاجات مرة واحدة
انت بتحوشهم ولا ايه
قول 3 صفات ب 3 كلمات بس توصف بيهم شخصيتك ؟
متبرقل .. جرنشوف .. ليظوك ..
هي الترجمة هتنزل امتي ؟! :)
بس حلو اوي ان يه واحد بيحب بلده وواحد لأ . هو دا الكلام
متبرقل جرنشوف ليظوك
حد ما يعرفش يعني ايه دول لا دانا كده زعلت بجد
لا بجد زعلت ابقوا اقروا شويه
عندكوا كتاب المتبرقل الجرنشوفي لابن ليظوك كتاب كده هينفعكوا كتير
ربنا معاك يا اسامه باشا المجانين في زياده ولا يهمك يا كبير المهم انك رديت عليه في الاخر
عجبنتي اوي الاجابه الخاصه ب "غشيت في الامتحان وانت صغير"
لأن ردك تقريبا عملناه كلنا
اولا كل سنه وانت طيب عشان رمضان
وكل دى تاجات متأخرة أنا عندى بردة تاج عايزة اعمله
وربنا يوفقك
تحياتى
جميل عزيزي اسامة
اجاباتك على صراحة ادتني انطباع غير اللي كنت واخده من بوستاتك اللي قبل كدا
وبمناسبة التاجات فلك تاج كمان عندي ياريت تاخده ...
تحياتي صديقي :)
سلام عليكم
ماشى يا عم المتبرقل. فينك من يومين متصبحتش قصدى متمستش
متصبحتش ايه!!!! . متمستش بطلعتك البهيه وسحنتك النديه من يومين . منفض ولا عامل فيها منفض
صحيييييييح
انسان
جرنشوف .
مبروك على التاجات الكتيررر الحلوة دى اولا جنانك مش ورد على حد وعلشان كده التاج الاول تحس انه معمول مخصوص ليك ومرسيى على الوردايه الحلوة دى اما بقى بالنسبة للتلات سطور الكلام حلو وتمام بس دول مش تلات سطور طول سطر ونص انت بتوفر ولا ايه
اما بالنسبة للهدف اكيد عندك هدف بدليل انك لو مسكت ورقه وقلم وكتبت انت احلامك ايه ونفسك فى ايه هتلاقى اهداف بالهبل بكرة اكيد احسن من النهاردة خلي املك فى ربنا كبير منير طبعا جاااااااااااااااامد وعندك حق مش تقدر تقول اغنية واحدة وحلوة الصراحة دى اه كلنا غشينا واحنا صغيرين مش فاهمين حاجة بقى وصراحة برده فى سؤال الرشوة الصراحة حلوة اما الصفات اللى انت قولتلها دى لاتعليق
مش السويس ..خنقة .. هى مش خنقة اوى يعنى .. هى بئت خنقة ..بلاش نظلمها .. مهما كان عايشنش فيها حلوها و مرها هههههههههه .. علىاد ما انا بضايق منها بس مش بحب حد يقول عليها حاجة :))
نقطة انك عايز تكون كذا حاجة مع بعض و انت عارف انك فى الاخر مش هتعمل حاجة ..بلاش تفكر فى الجزء التانى عشان مايتحولش فجاة قدامك لحقيقة .. انت تقدر تكون حاجات كتير بس الاهم انك تركز فى كل حاجة لوحدها و لما تحقق جزء فيها ابدء اشتغل فى الحاجة التانية لحد ى النهاية لما يكون عندك حصيلة كويسة من العشرتراشر حاجة اللى انت عايزهم ... و ربنا يوفقك
طب ليه الغلط بس يا اس اس
السويس على راسك من فوق فاهم !
ربنا يهديك ويكرمك
عجبنى اوى كلامك عن نفسك
لانه مفيهوش اى نوع من المغالطة او الغرور بالعكس دنتا صريح بزيادة
لو بنت كنت قلت عليك بت بجحة
هههههههههههه
تحياتى
وعلى فكرة شيلتلك تاكيد الكلمة يا سيدى
اى خدمة
تحياتى
مساء الفل عليكوا كلكوا وعليك يا ابو السماسم ربنا يكتر من تاجاتك يا سيدي وعقبالنا كده ناخد حتي خاتم مش تاج ومستنيك تكب في المنتدي بتاعي زي ما كنا متفقين الافتتاح هيكون بعد 4 ايام وهقولك علي الميعاد تاني المنتدي اهو للي عاوز يشرفني وشكرا جزيلاااااااااااا www.actionvb.com/vb
اول زيارة لمدونتك الاقى فيها تاج؟؟
يعنى ينفع كدا؟
دا اكرام الضيف؟:)))
بجد اجابات تحفه
سعيد بمرورى بالمدونه بس والنبى بلاش النشادر
عندى حساسيه:))
و زى ما اتعودنا بعد كل التاجات .. ديما برد على الكلام و التعليقات .. و يلا نبدأ بأول تعليق ..
.........................
انجى ..
يا اوجى انتى تيجي فى الاول فى الاخر ديما منورانى .. الف سلامه عليكي م الزهايمر هو مبقاش سايب حد خلاص .. انتى اعسل بجد يا اوجى و مدونتك من احلى المدونات اللى شفتها بجد .. نورتيني ..
..........................
غير معرف اللى انا عرفت انها دنا ..
تقريبا كده عسل اه دى تريقه .. عموما مش مهم عادى عادى .. نورتينا ..
.........................
محمد نبيل تيتو ..
ايون ما هو اللى داق مرارة السويس فاهم كلامى كويس .. و بعدين يا عم حد جاب سيرة انك بتغش .. هو اللى على راسه بطحه ولا ايه !! .. و بعدين يا عم ايه انا بحبك اوى يا تيتو دى هو انت خطيبتى !! .. بس نورت المدونه بتعليقك يا برنس .. ابقى تعالى كل يوم ..
..........................
د/ داليا ..
انتى على طول منوره المدونه يا دكتور ده اولا يعنى .. عمود من اعمدة شمو نشادر منذ لحظة انطلاقها .. بالنسبه للغيبه هى مكنتش طويله اوى يعنى ما انا معودكم على كده .. عشان مش تزهقو منى بس .. بالنسبه للاجابات بجد انا مكنتش اقصد ابقى غامض ولا حاجه انا جاوبت ع الاسئله بصراحه يعنى .. مش عارف الاحساس ده ليه وصللك .. المقولات بجد كتييييييير عشان كده مقدرتش اقول حاجه عشان مظلمش او انسى حاجه .. خدى دى يا ستى كمثال عشان خاطرك بس .. ربما يكون العالم الذى نعيش فيه هو جهنم كوكب اخر !! ..
بالنسبه للهدايا هو مش موضوع انانيه بس اول مرتب بقى لازم اظبط نفسى الاول .. يمكن ابقى اجيب هدايا من تانى مرتب يعنى .. هبقى افكر فى الموضوع ده .. الصفات بقى بجد انا مستغرب انتو ازاى مش فاهميمنها .. لا يا جماعه بجد خذلتونى ! .. عموما نورتيني اوى اوى يا دكتور و ربنا يديم المعروف ..
..........................
وليد ..
شكرا يا برنس انت أكول والله .. موضوع الهدف ده يعنى انا وضحته فى البوست هو فعلا ده تفكيري حاليا .. هو حاجه مش كويسه اه بس هى دى الحقيقه ..
نورتنى ..
............................
سنووايت ..
ياه ع القر بقى ياه .. ما انتو يا جدعان بيجيلكو تاجات برده ومحدش بيتكلم .. صحيح الكحكه فى ايد اليتيم عجمه .. واخد بالك يا عبعاطى ! .. ترجمة ايه يا سنووايت بس هو انتى برده مش فاهمه .. حتى انتى .. يا خسارة اللغة !!
نورتيني والله يا سنووايت ..
.............................
واحد انسان ..
عبد الله باشا منور المدونه .. اخيرا حد فهم الصفات .. ايوه يا عم كده شرحت قلبى .. ابقى فهمهم انت بقى و حياة ابوك ! .. و متشكرين ع التاج يا عم جاوبتهولك اهو عشان تعرف انى مش بعرف انفض .. سلام يا ابن محافظتى ..
............................
لورنس العرب ..
ايه ده بجد انت كمان عملت كده .. لا يا لورنس بجد صدمتنى .. وانا اللى كنت بقول لورنس القدوة و النبراس .. يلا مش مهم .. نورتنى يا حبى ..
............................
رئيسة حزب الاحلام ..
وانتى طيبه يا ريسه .. و يعيده عليكي بصحه وهنا وسعادع وخير ان شاء الله وعليكم كلكم .. نورتى المدونه ..
............................
ميرو ..
يا رب يكون الانطباع اللى اخدته احسن من الاولانى .. و متشكر ع التاج القديم و الجديد .. منورنى ديما يا دكتور ..
............................
ابو عبيده ..
شامم فى كلامك ريحة تريقه !! .. يا عم هو لازم تشوف الخلقه دى كل يوم يعنى .. انا برده لسه فى قلبى شوية رحمه .. بريحك شويه منى .. و بعدين بقى مش عايز اسيحلك بقى هنا ع المدونه .. بس مبروك يا معلم انت قالب الدنيا على حريتنا .. منورنى يا باشا ..
...........................
غير معرف اللى انا أيقنت انها نودى ..
الورده دى اقل حاجه يا نودى .. انتى تستاهلى بوكيه ورد .. لا بوكيه ايه .. انتى تستاهلى محل ورد .. بالنسبه للجنان .. هو انتى عرفتى منين ان انا كده ؟!! .. مع انى طول عمرى بحاول اخبى عليكي .. غريبه .. الواحد ميعرفش يخبى حاجه عن حد اليومين دول !! .. بجد يا نودى نورتيني و ديما منورانى و المدونه دى اساسا بتاعتك قبل ما تكون بتاعتى .. و كل تحياتى و حبى و تقديري ليكي ..
.............................
سوو ..
اااااه السوايسه هيزعلو مننا بقى .. لا بجد مش تزعلى مكنتش اقصد يعنى .. بس يمكن لما بقول السويس اقصد الدراسه والكليه والحاجات المخنقه دى انتى فاهمه بقى .. انما السويس بجد بقى ليها ذكريات معايا و حاجات متتنسيش .. و كمان هى بلد عموما جميله .. و انتى نورتيني ..
.............................
أية الشقية ..
معلش من تانى بنعتذر للسوايسه .. حبايبنا برده بس هى خنقه وانا مصمم انها خنقه ككلية ودراسه .. انما السوايسه ناس زى العسل .. زى العسل اهو اهدو شويه بقى .. و متشكر اوى على رأيك فى الردود .. وكويس انك شلتى تأكيد الكلمه كده احلى .. و نورتيني اوى ..
.............................
رفعت ..
منورنى ديما يا باشا .. ابن شارعى و عضو أساسى فى شمو نشادر منذ البدايه .. و شكرا ع الدعوتين الحلوين دول و يا عم انا بهديلك كل التاجات دى ولا تزعل نفسك .. و بعدين يا عم ما انا كتبتلك ع المنتدى محسسنى ان انا نفضتلك يعنى .. عموما اعذرنى برده اليومين دول يالذات لو قصرت .. وانا معاك يا سيدي لو احتاجتنى فى اى حاجه .. نورتنى يا برنز الليالى ..
أنقذت نفسك
بالوردة اللى أهديتهالى ياواد ياأووسى
انا اصلا نقطة ضعفى هى الورد بجد
وبما انى كنت زعلانة منك
فإنت كدة صالحتنى وعفا الله عما سلف
بس لية مقولتش دعاء موجهات؟؟
عموما مااشى..
وتقدر بقى تقوللى عاوز السبحة بأمارة إية؟؟؟؟
دا مسج حتى مشوفتش منك بتقوللى فيها حمدلله ع السلااامة...
ياوحش ياوحش ياوحش.....
بااى بقى..
كل دي تاجات يا اسامه :)
تستاهل اكتر من كده كمان ... ربنا يديم عليك الخير يار ب و تفضل مجنون كده .. الجنان احلي حاجه في الدنيا اصلا :) ..
و كل سنه و انت طيب ,
دايما كده غريب يا سمسم msk
دايما كده غريب يا سمسم msk
السلاام علي جميع المعلقين اللي قالوا كلام زي العثل وبعد اللي هما قالوه مقدرش اقول حاجه تانيه. بس هحاول بقدر الامكان افكلكوا طلاسم البوست اللي محيراكوا دي ..مش فاهم انا ازاي انتوا ناس تنمتون الي اللغه العربيه بوجه او باخر مش فاهم انا هتجنن..
على العموم هوضح لكوا اللي انتوا عايزينه بس الاول فعلا اسامه قليل الذوق ..انا مجبتش حاجه من جيبي انت اللي قولت..
من اعمال اس الجنونيه اللي فكر يعملها وفعلا شرع فيها هي هي _حد شايفنا الاول_ لالا كمل كمل
هي قلب نظام الحكم .
والله كنت ناوي اقولكوا على تفاصيل الخطه دي بس يلا رجعت ف كلامي كنت خلاص كتبتها بس مسحتها تاني... ياعم انا مالي.
وانا من ضمن الناس اللي قالتله انت عبييييط
معاني الكلمات:
متبرقل : اسم فاعل لفعل رباعي (برقل)
وهو الرجل ذو البصيره والاهتمام فيقال برقل الشيء اي اهتم به واعتني له.
جرنشوف : اسم غير عربي بالمره مأخوذ من اللغه الروسيه بمعني مجنون ههههه حلوه دي بيصف نفسه انه مجنون ما علينا
ليظوك : صيغة مبالغة على وزن فعيل . ليظك الفرس اي غسله وزينه يعني هو من الاخر دماغه نضيفه قصده كده .
اي خدمه ياس انا عايز العشره جنيه اللي كانت عليك وعليهم خمسه جنيه للتوضيح ده
MsAaY7 Face OFF
صباح الخير
والله صحيح الكلام ده ولا تهريج ؟؟
انا عن نفسى ممكن اخده انه جد ... خاصة انه مستند فيه ل اللغة العربية و قواعدها .
ارجو الافادة ..
تحياتى ... سلام
اخر تعليق يلهوىىىىىىىىىى مش مصدق نفسى احمدك يارب . ياجماعه فوق اى حاجه اس ده بعتبره بطين قلبى الايمن . وفوق اى اجابه قالها اكيد هو احسن منها بكتير ( مبالغه) a.z
blue wave ..
يا باشا لو كنا نعرف انك هتيجي دلوقتى بالذات مكناش جاوبنا التاجات خالص .. و كنا فرشنالك المدونه ورد كمان .. بالنسبه للنشادر يعنى هو اينعم صعب نستغنى عنها بس ممكن عشان خاطرك نعمل اوبشن جديد .. نشممك بصل مثلا !
نورت المدونه ..
........................
دعاء مواجهات ..
صالحتك ؟!! .. على اعتبار ان انا كنت مزعلك يعنى .. عموما يلا مش مهم .. و بعدين يعنى السبحه ايه علاقتها بالمسدج .. بلاش بقى المادية دى خليكي ايزي كده .. و بعدين انا قلت دعاء عمرو عشان بكلمك بصفتك الشخصيه مش التدوينيه .. و حمد الله ع السلامه تانى .. نورتى المدونه يا دعدع ..
...........................
غادة و رفيدة ..
ربنا يخليكم يا رب و يسعدكم و يهنيكم .. و متشكرين ع الدعوه الحوله دى بس ربنا يستر و متطلعش عليكم ..
نورتونى اوى ..
...........................
m.s.k ...
الله يكرمك يا حبى .. انت اغرب والله ..
نورتنى لاول مره ..
...........................
msaay7 face off ...
بقى انا قليل الذوق .. ماشى ماااااشى .. انا اقول اه انما انت متقولش يا عم الحاج .. ده انت غريب اوى .. و بعدين ايه قلب نظام الحكم دى انت هتلبسنى تهمه يا عمونا .. مكانتش حتة مظاهره صغننه يعنى .. حسابك معايا بعدييييين .. و بعدين ايه الاشتغالات اللى انت كاتبها دى .. بقى ليظوك على وزن فعيل ؟!! .. ازاى دى يعنى .. الناس صدقت يا ابنى هتخرب اللغة حرام عليك .. بس بجد يعنى يا برنس بشكرك كتير و انت من اكتر الناس اللى متابعه المدونه و احد العمدان الاساسيه برده .. و منورنى ديما ..
............................
داليا ..
لا طبعا ده بيخرف يا دكتور .. متصدقيهوش .. نورتينا تانى ..
............................
احمد زكريا ..
لا يا خويا صدق نفسك عادى بتحصل يعنى .. يا باشا انت بقى بطين قلبى الايسر و الشريان التاجى والاورطى و نخنوش عين قلبى من جوا .. و الصفات اللى انا قايلها دى انت بقى احسن منها مليون مره .. هو احنا نيجي فيك ايه بس يا موعاللمى ( نخع ) .. نورتنى ..
اسامةةةةةةةةةةة ههههههههههه عثل اوى الاسئلة دى واجاباتك حلوة اوى وبجد ميرسى على التاج الجامد دة اللى هيطلع عينى فى الكتابة هجاوبة حاضر بس بعد البوست لانى لسة منزلاة وميرسى تانى يا اسامة يا عثل
باى
عســـــــــــــــــــل
والله
ايه الشقاوة دي
اسامه
والله انا فقدت الذاكرة من اول الامتحانات لغايه ما خلصت يوم السبت 19/7 فاعذرني
اخر حاجه قريتها لك كانت جنه وكنتاكي بس مش في المدونة وبس لاء في الدستور كمان طول عمري بقول انك هتودينا في داهيه ههههههههههههههه بهزر مش تزعل مني
والله واحشني مووووووت انت ودؤدؤ
بس يا جماعه اعزروني هعوض ايام السهر وقلق الامتحانات وشرب مجات الشاي والقهوة والنسكافيه وهناااااااااااااام
ولما اصحي ابقي اكلمكم
سلالالالالالالالالالام
برنسيس بيري ..
اخيرا جيت يا جميل مستنيينك من زمان .. بجد يا بيري انتى اللى زى العسل والله و التاج ده اقل واجب يعنى .. و ربنا يعينك بقى ع الاسئله .. نورتيني موت ..
..............................
سباور ..
يا ابو السيد منور المدونه والله وانت أعسل يا حبى ..
..............................
حوبة ..
والله زماااااااااااااان .. وحشتيني اوى اوى اوى جدا .. انا مقدر والله معلش صعبانه عليا بجد .. بس خلاص بقى ان شاء الله كله هيبقى تمام و الحياه تبقى روقان و قرمشه و نشوفك بقى على طول .. نورتيني اوى بجد يا حوبه .. ربنا يكرمك ..
إرسال تعليق