الأحد، 8 فبراير 2009

المزيد من الثقوب !

كان لابد أن أكتب عن هذا الموضوع .. فليس من الطبيعي أن يحدث مثل ما حدث فى مدينتى و لا أشير إليه هنا .. ترددت أولا و جالت برأسى خواطر عن نتيجة كتابتى عن الحدث أو ثرثرتى حوله أو حتى تفكيري فيه .. لأننى أعرف _ كالعادة _ أن التفكير أو الكتابه لن يجلبان أى نتيجة سوى المزيد من احتراق الأعصاب و ارتفاع ضغط الدم و تأكيد فكرة كونى و كوننا جميعا أحقر من حذاء أصغر أمين شرطة فى دولة تقدس الأمن و المخبرين .. و لكنى فى النهاية قررت البوح حتى أكون جزءا من البخار المنبعث من الغلاية التى نغلى فيها جميعا .. قررت الرضا بمصيرى كجزىء من البخار لأنه على الأقل يملك كيانا ماديا .. حتى لا أعيش و أموت محسوبا على العدم ..

منذ يومين قتل مواطن مصرى فى قرية تابعة لمدينتى " السنطة " نتيجة التعذيب على يد ضابط شرطة .. لولا كلمة " مصرى " فى الجملة السابقة لوضعت الآلاف من علامات التعجب بعد نهايتها .. و لكن الكلمة أعطت للجملة واقعية و منطقية كبيرة .. أعطتها اعتيادية و نمطية لم تعد تثير التعجب أو تستدعى اتساع الأعين انبهارا أو احمرار الوجوه غضبا ..

الجميل فى الأمر أنه قتل فى يوم زفاف ابنته .. و هو ما يعطى الأمر بعدا دراميا كما ترى .. يقولون أنه كان هاربا من تسديد شيكات لجهة ما .. الهروب من تسديد شيك فى بلدنا _ كما تعلم _ يكون عقابه العادل الضرب و الطعن و التعذيب حتى الموت .. على الرأى العام أن يهدأ و لا يثقل ضميره بما لا يحتمل .. هذا رجل مذنب و قد نال ما يستحق .. هناك جرائم كثيرة يمكن السكوت عنها .. أما أن يهرب من تسديد شيكات فهو أمر لا يمكن تجاهله .. الأحمق كان يستطيع أن يقتل 1300 انسانا غرقا أو يقدم أكياس دم ملوثة للمرضى أو حتى يتحكم فى مصائر ملايين الشباب باحتكار سلعة استراتيجية لينجو بفعلته .. فهذه كما نعلم أشياء يبرىء القانون فاعليها .. أما أن يفعل ما فعله و لا يتم قتله فهو شىء لا تسمح الحكومة بحدوثه حتى لا تهتز ثقة الشعب بها ..

فقط السلطة التى تعلم جيدا جرائمها و تدرك حجم كراهية الشعب لها هى التى تعطى صلاحيات مطلقة لرجال الأمن و لضابطى الشرطة و تحميهم فى جميع الأحوال .. أعتقد أن عدد الضحايا الذين قتلوا على يد رجال الحكومة تعدوا منذ زمن عدد شهدائنا فى حروب التحرير .. إذن يمكن اعتبار الرئيس الحالى و الحكومة الحالية رئيس و حكومة احتلال .. أعتقد أنه حان وقت التعامل معهم على هذا الأساس ..

القضاء لن يأتى بحق أحد .. كيف أثق بالقضاء بعد حصول ممدوح اسماعيل على برائة و رفض قرار عدم تصدير الغاز لاسرائيل ؟! .. فى كل الأحوال لن يحصل الضابط القاتل على عقوبة الاعدام .. لن يقتل فى يوم زفاف ابنته كما قتل الرجل .. لن يأكل لحمه و يمزق جثته أبناء و عائلة الرجل .. إذن لا فائدة من انتظار حكم القضاء بفرض أن الضابط سيحاكم أصلا ..

كلما يتم إحداث ثقب آخر فى كرامتنا نثور و ننفعل ثم نهدأ و ننسى كل شىء .. ثم نعيش و نتحرك و نضحك و نعمل بثقوبنا .. نركب الأتوبيسات المهترئة و نقف فى طوابير الخبز بثقوبنا .. نقرأ الصحف و نلقى النكات بثقوبنا .. أناس مثقوبى الكرامة و الإرادة و الروح منذ زمن بعيد .. حتى أن الحكومة تبحث الآن جاهدة عن أماكن أخرى جديدة لإحداث المزيد من الثقوب !

متى سيحين وقت الحرب الأهلية بين الشعب و الشرطة ؟! .. أنا الآن أنتظرها فعلا بفارغ الصبر .. اتهمنى بعدم الوطنية أو اتهمنى بالجنون و عدم تقدير الأمور بشكل عقلانى .. أعتقد أننى لن أستطيع أن أعيش بقية عمرى عاجز واهن عديم الحيلة منهوب مهزوم نفسيا و مقتول معنويا و ماديا حتى أتمتع بوطنيتك المزعومة .. تبا للوطنية و تبا للعقلانية ! .. هم يراهنون على مدى تحملنا لكل هذا الذل و يخدعوننا بكلام على شاكلة الخيانة و العمالة و الحمق السياسى رغم أنهم يمثلون التجسيد الحى لهذه الكلمات .. لو كانت هذه هى الوطنية فأنا أول الخائنين ! .. و ليحتفظ من يريد أن يحتفظ بوطنيته التى صنعتها له الحكومة و فصلتها على مقاسه لتعيش هى مطمئنة و يعيش هو مرتاح الضمير .. بثقوبه !

هناك 19 تعليقًا:

غير معرف يقول...

كالعاده والمزيد من النشادر التى تنهال علينا فى كلمات من قلب مؤمن بأحقيه الادميه التى نفتقدها فى اوقات كثير من هذا العهد!!!!!!!!
المقال هايل يا اسامه بدون اى تحفظ وللاسف دى مش الحادثه الوحيده فى غيرها كتيييير أوى وبصور ابشع من كده...وديما السكوت علامه الرضا!!!!
شدنى اوى تعبير..
-حتى أن الحكومة تبحث الآن جاهدة عن أماكن أخرى جديدة لإحداث المزيد من الثقوب !
مبقاش فى مكان لمزيد من الثقوب
اصلا ده احنا حتى رضينا بالذل والذل مش راضى بينا....وعجبي

-لو كانت هذه هى الوطنية فأنا أول الخائنين ! ..
الوطنيه حب لوطنك وغيره عليهه عشان ديما تبقى احسن لكن للاسف فى بلدنا الوطنيه حب من طرف واحد!!!!!
ولمزيد من التقدم والازدهار الفكرى يا عبقرينو يا جاااامد
moon light){)}

غير معرف يقول...

ممممممممممممممم موضوع حلو مع انى بغرابه شديده مسمعتش عنو بس مش مبسوط
لما الكلام ولا يودى ولا يجيب يبقى ليه البتعملو ده .
مش مبسوط حتى لو شفت 100 تعليق يقلك البوست حلو هفضل مش مبسوط لانى هعرف ان فى 100 واحد مش بيحبوك بجد ولا خيفين عليك وعلى مصلحتك
انا بقلك اعقل يأسامه وشيلو صدقنى دى مش صراحه ده انتحار
انا ماجد يسيدى

غير معرف يقول...

........بسم الله الرحمن الرحيم ......

أولا أحيك على عرضك الرائع للواقع الاليم وعلى احساسك العالى بواقع الحياة

..........

بــــس هل يوجد حل .....؟

والحل دة هيجى من عندنا ولا عندهم ولا بجرة قلم ولا يمكن يجى الحل من عند ربنا .

يمكن يكون الحل اننا نبعد عن ربنا كمان شوية لان الحكومة بعيد اوى وحنا مش فى بعدها فسعدونى وساعدو بعد وعلقوا فى كل حتة اننا لازم نبعد احنا كمان عشان نسبق الحكومة او نوازيها وانا اعتقد ان سبقناها هنفهمها


طب نفترض على سبيل المثال ...
ان الحكومة بطلت الى بتعملة وكافأت
الشعب بمرتبات شهرية وعدشى فى حد بيظلم فى الجمهورية .......
كام واحد هيبقى مبســــــوط وفرحان
وكام واحد هيبقى زعلان ومضـــــايق



ولا يمكن الحل فى شرع واحد يلمنا كانا
حكومة بشعب ونحيا تحت ظلة ....
وان كنا نتمنى ذالك ... ماذا فعلنا.. لنصرة هذا الدين

فتحنا مواقع ومنتديات وقعدنا ع القهاوى وسبنا المهمة الى مكلفين بيها كاشباب المفروض ان ربنا خلقة ليعمر فى الارض

والحكومة عملت زينا بظبط سابت حتى القانون الفرنسى وبقت تلم فى الى بيعمرو فى الارض


الموضوع كبـــــــــير ......


وعاوز كلام كتير بالنسبة للطرفين
سواء الحكومة او الشعب
وفى الختام

........ نور الله لا يهدى لعاصى......


سواء الحكومة او الشعب....

غير معرف يقول...

انا مش عارف نظرية الاخ
بتاع الموضوع
كبير . دة يأصد اية
يعنى أحنا كفرة يعنى
ولا مش مسلمين ..... ولا اية

غير معرف يقول...

يااااااااااااااااااااااا جماعة ردو


ع الشخص بتاع الموضوع كبير دة ....


وحاولو تنقشوة يمكن تكون وجة نظرة
صح ...............
حــــــــــــــازم$

أية الشقية الشعنونة يقول...

تحياتى يا اسامة طبعا
عارفة انى بغيب
بس الأمتحانات وزى منتا عارف
اما تعليقى
ف انتا عرفته أكيد
تحياتى
اما عن الراجل
فحقه عند ربنا
لأن حكومتنا محدش بياخد منها حق ولا باطل
اييييييييييييييييييه
هنقول ايه ولا ايه
مبقاش منه فايدة الكلام

تحياتى
سلام عليكم

Ghada , Rofayda يقول...

اخي اسامه
********
اولا تحياي و معذره علي الغيبه الطويله .. ثانيا

بالنسبه لاخي الموقع (نور الله يهدي به من يشاء)
****************************
وصلتني فكرتك ان الحل في اليقين في الله سبحانه و تعالي و التمس بشرعه ...

اخي اسامه .. وبعدين ..

ساعات بلاقي الدنيا باظت قوي .. عارف .. خلاص مش نافع تتلم .. باظت من كل ناحيه .. هنلاقيها منين ولا منين ..

داخيلا ولا خارجيا
شخصيا ولا وطنيا
قوميا ولا عالميا

بايظه بايظه ...

بس ارجع اقول (ولا تهنوا ولا تحزنوا و انتم الاعلون ان كنتم مؤمنين) صدق الله العظيم .. علي فكره اقرا الايه كده من منظور مختلف ..

الفكره كلها .. نحس بالعزه .. نعترف للغلط انه غلط و الصح انه صح .. و ربنا سبحانه و تعالي نتمسك بشرعه ,, عارف

نعترف ان ربنا سبحانه و تعالي قادر .. بس منهربش .. و انا نفسي بهرب .. عارف

بهرب بالياس .. والله الياس هروب

اخي اسامه دي مش دعوه للتفاؤل .. دي افكار جايه مخي .. انه لا

مش احنا .. عارف .. مش اسامه نشادر مثلا .. اللي في موقف ما في زمن ما لما مصر تحتاجه .. هنلاقيه يائس قانط قافل علي نفسه .. لا و لا انا ولا اي حد مننا كلنا

عارف .. كلمه حلوه في الاعلانات .. البركه بالشباب ...

احنا الخيط و البكره .. عذرا الخير و البركه

اوعي تياس و انا كمان مش هياس .. بس نمهد لاحلال الخير لبلدنا .. بالايمان و بالعمل ..

دعائض بيقول: اغرس في كل ثانيه تسبيحه , و كل دقيقه فكره , و كل ساعه عمل ...

غير معرف يقول...

ابن خالتى اسامه احييك فعلا على هذا الموضوع انه بجد يكشف اغلبيه ثقوب الحياه لو ماكنتش كلها وبجد جميل انك تكتب هذا الموضوع ويا ريت تحول تكمل فى هذا الطريق وهو كشف ثقوب الحياه ويا ريت كمان تبقى تسهل معانى كاماتك شويه علشان التى زى حالاتى يقدر يستوعبها

shekoo el lazeeez يقول...

الموضوع رااائع واسلوبك جميل جدا

بس

كده مش تمام انت بتخبط جامد يا ابني احنا عاوزينك
اللي بيقولك (جميل وكمل في الطريق ده) مش خايف عليك..........................................ميعرفش ايه اللي ممكن يحصل بعد اللي انت كتبتو ده بجد يا اس اس لازم تحط لنفسك حدود علشان تقول رايك من غير متعمل لنفسك مشاكل ........!!!!!!!!!!!!!!!!!!!!!!!!والله انا بقول كده بس علشان خايف عليك. ونفسي تكمل المشوار اللي انت بدأته بس من غير مشاكل توديك (((((وراء الشمس)))))

غير معرف يقول...

على حسب الكلام المكتوب فى كل الكومنتات باين كده انى انا الوحيد الواخد بالى من كده يأسامه !!!!!!!!!
شئ يرجعلك انك تاخد بيه ولا لا بس لو سمحت تدعوهم يكتبو حاجات زى كده على المدونات بتاعتهم انا عايز اشوف هما فعلا جرأه ولا "الآيدو فى الميه مش زى لآيدو فى النار" .
ثالث مره اقرا الموضوع يأسامه ويعجبنى جدا والله بس بازعل من انك لسه معدلتوش .

غير معرف يقول...

السلام عليكم و رحمة الله و بركاته

ياااااه كل دا تأخير ف الرد !! مع أنى أول حد قرأ البوست .. ما علينا المهم الجهاز ربنا يعينه اشتغل الحمد لله

اولا : نطلب الرحمة للفقيد و نتمنى من الله عز وجل أن يحسن مثواه و يجعله من أهل الجنة

ثانيا : ايه الجديد ؟؟!!
ما دا حال الشرطة من زمااااان !!
صحيح الأمور زادت عن حدها ف الأونة الأخيرة و حوادث الشرطة مع الشعب أصبحت ما أكثرها ..
لما يوصل الجبروت أنهم يمثلوا ب جثة عشان يخرجوا منها رصاصة لانها الدليل على الادانة بالرغم من وجود الشهود و أداة الجريمة .. و الجريمة واضحة و أكيدة .. كل دا ل حماية الضابط !!!
ومين بيحميه ؟؟!!
ال الاسف الاكبر منه اللى المفروض يكونوا هم القدوة و يدينوه على فعلته .. و الاكيد الكبار المسنودين

كل دا و مش مهم الانسان اللى مات ظلم ..ولا له قيمة ؟!.. و أهله مش من حقهم يدوروا على حقه و لا يتكلموا أساسا!!

بالرغم من كل دا و الله بلدنا عامرة بالشرفاء اللى نفسهم يعملوا حاجة .. لكنهم فى الاخر مكبلين بالاعلى منهم و بالقوانين اللى تخدم مصالح ناس على حساب ناس و نسوا أن ف رب مطلع على العباد و يعرف ما تخفى الصدور ..

الشرطة ف زمانا حاسة أنها أخدت أكتر من حقها و عدت الجيش ب مراحل !!

الشرطة اللى المفروض بتطبق النظام و بتحمى الشعب و بتحمى الضعفاء من أبناء الوطن .. الوطن اللى هو مصر

ما شربتش من نيلها ؟؟!!
الصح ترد و تقول شربت من مرها
يبقى أنت أكيد ..أكيد فى << مصر >>

أسفة ل الاطالة .. و كل سنة و انت طيب .. وكل سنة و أنت بألف سلامة و دائما مشرق و دائما مبدع و تفوقنا كمان و كمان ..

** Happy BirthDay For Ur Blog **

** Happy NewYear For You **

أرق تحياتى .. سلام

شـمو نشـادر يقول...

ردى للأخ تيتو ..

أولا .. انا مش عارف حضرتك ازاى تعرف الحقيقة الكاملة زى ما ذكرت .. يعنى حضرتك كنت معاهم يومها مثلا و شفت اللى حصل ؟! .. لو مكنتش معاهم و شفت بعنيك يبقى ممكن تقول ان ده رأيك او ده اللى سمعته .. لكن متقولش انها الحقيقة الكاملة ..

ثانيا .. بأمانة انت شايف القصة اللى انت قلتها دى مقنعة ؟! .. الراجل اعتدى على رئيس المباحث المسكين بخنجر و حاول يضربه و أتلف العربية كل ده و هو تعبان و مريض و عنده صمام فى القلب .. و بعد ما يعمل كل ده أول ما يمسكوه المخبرين _ يا سبحان الله _ يفتكر انه تعبان و يموت على طول ! .. أعتقد ان الشرطة فى مصر محتاجة مؤلفين كويسين شويه عن كده عشان يقدرو يألفو قصص أكثر إقناعا !

ثالثا .. محدش قال ان الراجل بطل زى ما حضرتك قلت .. الراجل ده مجرد مواطن مصرى زيي و زي حضرتك كده بالظبط لكن تقريبا مش زى الظابط اللى قتله .. الظباط طبعا مش ناس عاديين زينا !

رابعا .. أنا مش مستنى أعرف الحقيقة اللى متفبركة فى قسم الشرطة عشان اقولها .. أنا سمعت _ زى ما كل الناس هنا سمعت _ ان فى ناس كبيرة حطت ايديها فى الموضوع عشان يتكتب فى التقرير ان الوفاة كانت طبيعية و ميحصلش مشاكل .. يبقى عايزنى اصدق التقرير و لا اصدق كلام أهل الراجل الغلابة اللى أساسا نفسهم ميحصلش مشاكل ولا سين ولا جيم ؟!

خامسا .. حضرتك وصفت الكلام بانه " شعارات فارغة " .. فعلا دلوقتى الكلام عن حقوق الناس فى بلد زى دى بقى شعارات فارغة .. دلوقتى لازم نتقتل و احنا ساكتين و الا نبقى قلالات الأدب و لازم نتربى .. و لو كنت بتقول ان الراجل مات بشكل طبيعي حسب رواية الحكومة .. عايز افكرك بعماد الكبير و بسواق التوك توك اللى ولع فى نفسه فى اسكندرية و بأمثلة غيرهم كتير أوى كلها حالات تعذيب ملهاش حصر ..

سادسا .. نورت المدونة أوى و يا ريت ترد على كلامى و تعرف كل الناس حضرتك مين بالظبط و تعرف الكلام ده عن القضية ازاى ..

غير معرف يقول...

ملحوظه لصاحب المدونه "لو ينفع تعمل بلوك هنا يريت تعمل بلوك او ترمى كل تعليقات الشخص الاسمو حازم هنا ده بجد عامل صداع على الفاضى بموضوعو الكبير ده "
وشكرا
انا ماجد يبرنززز

غير معرف يقول...

السلام عليكم و رحمة الله و بركاته .

ايه دا يا بنى ؟؟!!
أنت بتقرأ أفكارى !!!

بجد و الله لسه امبارح كنت ف مكان و قلت أفتح البلوج من على الموبيل و قعدت أقرأمن أول بوست بالكومنت ..
قلت يا ربى ما فيش طريقة أسهل من كدا عشان أفتح على البوست على طول !!

يا سبحان الله .. أفتح ألاقيك عملت الارشيف بالطريقة دى !!!
بجد كدا أسهل و أسرع ف أختيار البوست و كمان لو ف دماغى بوست معين ..مش ألف البلوج كله عشان أوصل ..

مش عارفة أنا بقولك الكلام دا ليه .. لكن حسيت انى سعيدة أوى لما لقيتك عامل الأرشيف بعد المعاناة اللى كنت فيها امبارح !!

ميرسى ليك بجد .. تحياتى .. سلام

غير معرف يقول...

جميلة جدا يارب

حقع يجيله يارب

غير معرف يقول...

جميل جدااااااااااا

يارب يجيب حقه

غير معرف يقول...

انا ابن عم اسامه على فكره اسامه بيعيش اخطر مراحل الاكتئاب اليومين دول وده انعكس على كتاباتو ولاكن هل اسامه كتب كده لانو هو مكتئب ولا لان الواقع اصلا هو اللى كده دى الحقيقه المؤلمه ان الواقه هو اللى وحش واليم وبالتالى اسامه تاثر جدا بيه وبالتلى انعكس عليه على اعموم انا طبعا من بلد اسامه وده فعلا حصل وحتى ده لو كان من اخطر المجرمين هل سيكون اخطر من ممدوح اسماعيل او يوسف والى علشان ومت من الضرب ويموت بطريقه غير شرعسه على العموم هو ده حال بلدنا طبعا فكره الوطنيه اللى اسمه بيتكلم عنها دى من عدمها انا سعات ببقا معاه لان البلد حالها سعات بيوصلنا اننا نكفر بالوطنيه مش من اجل مكاسب شخصيه ولاكن من اجل اننا نعمل تغير فى البلد انا يمكن الوحيد اللى فاهم هو عايز يقول ايه وانا اكيد بوافقو على اللى بيقولو لان مش اهم حاجه اسم الكلمه ومظهرها اهم حاجه الجوهر انت من جواك كمواطن عايز تعمل ايه والى مزيد من التقدم واحد مظلوم

غير معرف يقول...

هاااااااااى يامان الموضوع جامد قوى وانا احييك على شجعتك والكلام حلو قوى وفى محله بس الكلام خطير وانا من راى انك تمسك اعصابك وتتمتلك نفسك وانا احيى ماجد اللى بينصحك وانا كمان هنصحك معاه وربنا يوفقك

محمد فهيم

غير معرف يقول...

السلام عليكم ورحمه الله وبركاتة

http://savesanta.blogspot.com/

شاركوا فى نشر هذة القضيه فى كل مكان وقدر المستطاع وتفاعلوا معها بالتعليقات والاجابه على استطلاع الرأى معنا حتى لايفلت المجرمين من العقاب شاركوا فى حمله لاللتعذيب لالتلفيق التهم لالانتهاك حقوق الانسان لالبلطجه الشرطه لالافلات المجرم من العقاب كونوا ايجابين وتخيلوا انفسكم مكان هذا الرجل العاجز الذى ضرب فى مركز الشرطة وتم تعذيبه بابشع الطرق وتم كهربته حتى فاضت روحه والان المجرم الذى قتله رئيس مباحث السنطه الرائد وليد غنيم حر طليق يتمادى فى اجرامه ويلفق التهم للابرياء سجن مركز السنه اصبح مقتظ بالابرياء ولا احد يسمع بهم ولااحد ينصرهم فلنتكاتف اخوانى ولنعمل على نشر هذة القضيه وفضح هؤلاء المجرمين على مواقع الانترنت وعلى المنتديات وعلى المجموعات الخاصه فلنجعلها قضيه راى عام ولنسمع المسؤلين اصواتنا ومن يستطيع المساعدة باى طريقه لايتاخر فمن كان محامى يستطيع ان يتطوع للدفاع عنهم ويرفع دعاوى مباشرة على وزير الداخليه حتى يقضى على الفساد فى السنطة ومن كان صحفى ينشر فى جريدته ويفضحهم ولنعمل جميعا على فضح المفسدين حتى نطهر بلدنا مصر الحبيبه منهم وختاما وفقنا الله واياكم لنصرة المستضعفين وجعل الله هذا فى ميزان حسناتنا

وجزاكم الله خيرا

جبهة انقاذ السنطة
save_santa@hotmail.com