يا خسارة الورد !

القصيدة دى قديمة .. بس قلت انشرها هنا بالمرة .. ما هى مجتش عليها يعنى .. بجملة !

انت ميت ولا عايش ..
انت دايب ولا بايش ..
انت صاحى ولا نايم ..
ولا شادد حيل و قايم ..
انت ماشى ولا راكب ..
ولا فاتح باب موارب ..
انت بحار ع المراكب ..
ولا نجار باب و شيش ؟!
لو عرفت تقول مفيش ..
قوللى عايز بس اعيش ..
يمين شمال ميهمنيش ..
تلاقيني حتى ساعات مبسوط ..
و هتفرق ايه لو متلاقينيش ..
و حياة ابوك سيبنى ف حيرتى ..
و الله محتار ..
مبقتش من صلاحياتى ..
أعرف أختار ..
خيال مآته حطوه بالظبط .. ف وسط الأرض ..
أراضى تحقيق الأحلام ..
و انا حلمى طير بيلف يدور ..
و نفسه يحط .. علادى الأرض ..
لكن يا عيني هيحط ازاى ..
و الخوف واقفله بيبنى السد ..
الطير وقع !
ما هو أصله من كتر الطيران ..
جناحه اتهد ..
يا خسارة الطير..
يا خسارة الحلم ..
حرقتو كل زهور الورد ..
يا خسارة الورد !