التقدم نحو الخلف !!

لأنهم اعتادوا دوما أن يكونوا خلف المدفع .. فمن المؤكد أنهم لن يهضموا بسهولة فكرة أن تصوب عليهم القذائف ..

أتحدث هنا عن المدونين ..

اعتادوا دوما أن يهاجموا و ينقدوا .. يتأملوا و يحللوا .. دائما هم فى موقف الرقيب و فى وضع المتربص .. و لذلك فلم يحدث أبدا أن نالهم أى نقد موضوعى .. أقصد بالطبع النقد الهادف الى توجيههم للأفضل و تعرية عيوبهم أمامهم جيدا .. و ليس الموجه من أشخاص و جهات ترعى النظام الفاسد و الحكومة التى فاحت رائحتها حتى أصيب الجميع بالغثيان ..

ليس هناك أحد فوق النقد .. لا أحد فى التاريخ الانسانى كله غير قابل لتفنيد عيوبه و مواجهته بها برفق أحيانا _ اذا كان الرفق أفضل _ و بعنف و قسوة أحيانا أخرى _ اذا كانا هما الأجدى _ سوى الأنبياء و المرسلين الذين تكفل الله وحده سبحانه و تعالى بأن يعصمهم من الخطأ و الزلل ..

نعم .. هذه المقدمة الطويلة كانت لكونى أنتوى أن أنقد المدونين و أتأمل قليلا ببعض العمق فى عالمهم .. مقدمة هدفها فقط تهيئة عقول المدونين التى اعتادت فقط على النقد و الهجوم لأن تستقبل بعض النقد .. المدونين الذين أراهم متدفقى الكتابات _ ما شاء الله مبنقرش _ منفجرى النشاط دون أن يتوقف أى منهم لحظة ليسأل نفسه : ماذا أقدم بالظبط لمن يقرئوا ما أكتب ؟ .. ماذا أضيف لمجتمعى ( ان كنت أضيف أصلا ) ؟ هل أضيف قيمة لمن يقرأ أم أهدم _ و لو حتى بدون قصد _ مبدأ و أزرع أفكارا خاطئة ؟
اذا كنت راضيا عن الأوضاع فلماذا أنا راضى ؟ و ان كنت ساخطا على النظام و لا أكف عن الهجوم عليه فلماذا أيضا أنا ساخط ؟ و هل أنا ساخط حقا الى هذه الدرجة ؟!

أكاد أقسم أن النسبة الأكبر من المدونين لا تدرى أصلا لم تفعل ما تفعله .. ربما جزء ما لا يزال نقيا بداخله يخبره بأنه يخدع نفسه و يتمادى فى ايهامها .. و لكنه لا يستطيع أن يقاوم كل كيانه الذى يريد أن يقنعه بأنه يملك هدفا و مبدأ .. يرهب الضغط على نقاط ضعفه فى سبيل ايجاد علاج لها .. و يتمركز و يتمسك فقط بمميزاته التى يراها فى نفسه أو التى يريد رؤيتها ..

أعتقد أن النماذج الغير جيدة فى المدونين كثيرة .. و أعتقد أيضا أنه حان الوقت لمواجهة أنفسهم بأخطائهم .. فالأحرى من فئة مثل المدونين الذين يدعون طيلة الوقت المثالية و الملائكية و يتصيدون أخطاء غيرهم بحجة رغبتهم فى " تقدم المجتمع " أن يواجهوا أنفسهم أولا و ليكونوا أكثر قسوة على أنفسهم .. ينبغى لهم ليتقدموا و يصبح تأثيرهم أقوى أن يرتدوا قليلا نحو الخلف .. فلو أن مبدأهم فاسد فكل ما يقولوه _ حتى لو ظاهره رغبة الاصلاح _ فاسد ايضا .. لنرتد قليلا الى الخلف حتى نسير نحو الأمام بضمير مطمئن ..

( راااائع .. ايه الحلاوة دى .. من أجمل ما قرأت .. متمكن و موهوب .. معانى جديده و احساس عالى .. الخ ) ..تلك كانت فقط مقاطع صغيرة للغاية من سلاسل طويلة لا تنتهى من تملق و رياء متناثر دوما فى تعليقات المدونين على كتابات بعضهم البعض .. حتى هنا على مدونتى أجده كثيرا على نصوص أكتبها و أعرف يقينا أنها متواضعة و ضعيفة أدبيا .. فجأة تكتشف من التعليقات أن جميع مدونى مصر هم نسخ أخرى من يوسف ادريس أو أحمد خالد توفيق .. الكل يتملق الكل و بغزارة منقطعة النظير ..

نفاق أجد له الكثير من التفسيرات الغير مريحة على الاطلاق .. مثلا من الممكن أن يكون هذا الكلام هو الرأى الحقيقي لكاتبه .. و لكن عندما يكون النص المكتوب ضعيف أدبيا ركيك لغويا _ و ما أكثر هذه النصوص _ فقائله بالتأكيد حمار لا يفقه شيئا ولا ينقد على أسس موضوعية .. و فى هذه الحالة أفضل ما يفعله هو أن يخرس و لا يدلى برأيه .. احتمال أخر أكثر عفونة .. هو أن يكون المتملق شابا و الكاتبة فتاة .. طبعا فى هذه الحالة فانه ينافقها طمعا فى شىء ما أخر و علاقة أخرى تجمعهما غير كونه قارىء لها .. مستغربين صح ؟

أقسم بالله أن ما سأقوله حدث حرفيا .. جائتنى دعوة اضافة على الايميل الخاص بى ثم اكتشفت أنه مدون صاحب مدونة معروفة .. كلمنى دقيقتين على اعتبار أننى فتاة _ و هو ما يدل على الغباء المتناهى لهذا الشخص .. هو عارف نفسه _ ثم عندما اكتشف أننى شاب لم يرد على بكلمة .. و لم يدخل مدونتى أو يضع تعليقا بها بعد ذلك !!

موقف أخر حدث مع مدونة زميلة .. كانت تتحدث على الايميل مع أحد المدونين الشباب عندما تطاول عليها فى الحديث .. كلام مقزز و ألفاظ قذرة و أسلوب مقرف .. أتذكر جيدا صدمتها عندما كانت تروى لى هذا الموقف .. كانت هى الأخرى تتخيل أنه _ من كتاباته التى تشع مثالية و ثورة على الخطأ _ ينقصه جناحان ليصبح ملاكا .. بالمناسبة هذان ليسا نموذجين فرديين كما سيدعى البعض .. بل هما عنوان لشريحة كاملة فاسدة من المدونين ..

احتمال أخر للتملق .. هو أنه ينافق لينافقه الأخرون .. أو باللغة الأكثر وضوح " يكسب زبون " يأتى عنده دائما فى المدونة و يضع تعليقاته التى تنفجر اعجابا بروعته و أسلوبه ..و كأننا فى سباق محموم هدفه جمع أكبر عدد من المعجبين .. أو أكبر عدد من المنافقين ..

كارثة وجود هذا النفاق و التملق أن المدون بعد فترة يصدقه و يستمد ثقته بنفسه منه .. ثم مع الوقت بعد أن يري كل هؤلاء الحواريين المسبحين بحمده كل يوم يعتقد أنه وصل لقمة الهرم الفكرى .. يتخيل أنه كون معتقداته عن كل شىء فى الحياة و كل من يعتقد غير معتقداته فهو حمار بدون جدال .. يتملكه الغرور .. كل المدونين يملكون نرجسية غير طبيعية .. ثم يتحول من مغرور نرجسى الى ديكتاتور لا يقبل النقاش و لا يثنيه أحد عن أرائه مهما كان وضوح حجته .. ربما يصبح يوما أكثر ديكتاتورية من حسنى مبارك شخصيا .. أعرف الكثير من هذه النماذج و لا أطيق حتى الحديث معهم ..

الكارثة أن المجتمع كله يعانى الزيف .. زيف فى كل شىء .. ثم أكتشف أن من كانوا يهاجمون بضراوة هذا الزيف مزيفون حتى النخاع .. مجتمع تملكه الخراب و فئة خربة و متصدعة تهاجم هذا الخراب أملة فى تغييره !!

غبت فترة ليست قصيرة ثم عدت .. عدت مهاجما فئة من المفترض أننى أنتمى اليها .. و لكننى أعلن الأن أننى لا أنتمى لجماعة المدونين حتى لو استمريت أكتب فى هذه المدونة .. أريد فقط أن أنتمى لعدد محدود منهم أراهم فعلا أقوى من كثير ممن يدعوا فى أنفسهم بطولة ليست بهم رائحتها .. و أرى أن هذه المدونة فقط وعاء مضطر لأن أصب فيه كل ما يجول بعقلى من أفكار لأننى لا أجد وعاء أخر .. و أتمنى أن يقرأ هذا الموضوع أكبر عدد من المدونين و ان كنت أشك أن أحدا سيقرأه من الأساس خصوصا أننى أعتقد انهم نسونى منذ فترة .. لأن منهم الكثير لا يهمه سوى أن أذهب لمدونته لأعلق على ما يكتبه ليأتى الى هو الأخر .. و أنا لا أتعامل بـ " منطق الحلاقين " هذا .. و لن أذهب بعد ذلك سوى لمن أقتنع به و لن أكتب تعليقا يحمل شبهة مجاملة أو نفاق .. و أرجو من كل من يقرأ هذا الكلام من المدونين _ و أنا أولهم _ ألا يستثنى نفسه من النقد و يعتبر نفسه فوق مستوى الشبهات .. ليفكر جيدا و ليسمح لنفسه ببعض الوقت يرتد فيه نحو الخلف .. فقط ليكون تقدمه أكبر و خطواته أسرع !

من غير عنوان !

مش عارف ..

انا مكنتش ناوى اكتب حاجه على فكره ..

بس انا كتبت لانى لقيت انه من قلة الذوق اسيبكم كده و اعيش انا مع نفسى كده ف افكارى ..

قلت اعيشكم معايا بالظبط اللى انا حاسس بيه عشان تعذرونى ..

بصو يا جماعه ..

من بعد الموضوع بتاع برائة ممدوح اسماعيل ده و انا مش مركز ..

قعدت افكر .. هو انا المفروض اكتب فيه ؟

طيب لو كتبت .. هكتب ايه يعنى ؟ .. اكيد لو سبت نفسى براحتى مش هكتب غير سلسة هائلة من الشتايم الخارجة و الألفاظ النابية التى يندى لذكرها الجبين و هوجهها كلها للقاضى و لممدوح اسماعيل و لحسنى مبارك .. بس طبعا مينفعش عشان المفروض ان دى مدونة محترمة و فى أنسات بيدخلو عندنا ..

وبعدين اصلا لو كتبت حاجه .. هتفرق فى ايه ؟ .. اللى هكتبه ده مثلا هيخليه ياخد اعدام بدل البرائة ؟

باختصار .. انتابنى شعور كارثى بالتضاؤل ..

انا ولا حاجه .. و معلش يعنى .. انتو ولا حاجه .. اكتبو .. و ابقو قابلونى ..

فقررت انى مكتبش فى الحوار ده ..

طيب .. كويس .. طب اكتب فى ايه بقى ..

فى مواضيع كتير كانت فى دماغى .. و كنت عايز اتكلم فيها ..

بس بعد اللى حصل .. لقيت انه من السخف انى اتكلم في اى موضوع .. هحس انى بضحك على نفسى ..

مقدرتش ..

و بالتالى قلت انا مش هكتب حاجه خالص لاجل غير مسمى ..

لكن رجعت قررت اكتبلكو اللى كتبته ده عشان تبقو عارفين اللى فيها و متزعلوش منى لما اقعد فتره طويله مكتبش ..

حاجه اخيره واقفه ف زورى بس هقولها قبل ما اسيبكو ..

جاء فى حيثيات حكم البرائة على سيدنا و مالك أرواحنا ممدوح اسماعيل البنود الأتية ..

_ الضحايا لم يموتوا نتيجة الغرق .. بل ماتوا نتيجة صدمات عصبية و التهابات فى الحلق .. ( !!!!! )

_ ممدوح اسماعيل و نجله غير مسئولين عن الابلاغ عن غرق العبارة .. ( !!!!! )

لو كان اللى بيتكلم مجنون .. يبقى المستمع عاقل ..

بعد الكلام ده متهيألى انى خدت القرار الصح لما قلت مش هكتب عن موضوع البرائة .. مالوش لزوم .. مالوش لزوم .. و ربنا ما ليه لزوم ..
سلام يا جماعه ..

مخلوقات للظل فقط !

كم أمقته !

نعم .. أمقته كثيرا .. أمقته و أمقت غروره و تظاهره و مشيته المتعالية .. أمقت نظرته البلهاء المفتعلة التى يظنها بالغة الرومانسية .. أمقت تصفيفة شعره و ألوان قمصانه و أحباله الصوتية .. أمقت الساعة التى ولد فيها و الأرض التى سار عليها !

أمقته برغم كونه مصدر رزقى .. و برغم مصاحبتى له فى كل مكان تقريبا ..

انتشر كالكابوس خلال العامين الماضيين .. صار بوسعك أن تستمتع بطلعته البهية و حنجرته الشجية فى كل مكان و فى أى وقت .. افتح التلفاز و ستجد " كليبا " له .. استمع للراديو لتسطدم بأغانيه .. اقرأ أى مجلة لتجد موضوعا عنه أو حوارا معه .. انظر عبر نافذة غرفتك لترى" بوسترا " له .. ادخل الحمام و ستجده فى انتظارك بالتأكيد !

لا أعرف ماذا يملك هذا التافه كى يصبح اسمه جزءا من ثقافة و ذكريات شعب بأكمله .. لا يتمتع بصوت قوى يؤهله لكل هذه النجومية و الشهرة .. و لا يملك شخصية ساحرة تخلب الألباب .. و لا يقدم فنا مختلفا و مهما .. فى الغالب لم تعد هذه المؤهلات تجدى اليوم .. من الواضح أن مؤهلاته الخاصه تتلخص فى عضلات ذراعيه البارزة و شعر صدره الغزير و حركات جسده المائعة .. و للأمانة هو شديد البراعة فى هذه الأمور !

قرأت منذ ما يقارب العام الاعلان الذى نشره فى الجريدة عندما كنت جالسا على القهوة أحقق ذاتى فى لعب الطاولة و مشاهدة الفتيات بعد تخرجى من كلية التجارة .. كان يطلب فيه " بودى جارد " أو حارسا خاصا له يرافقه فى كل مكان بمرتب يسيل اللعاب .. لماذا ؟ .. بالطبع ليحميه من هجوم الفتيات الهائمات بجمال لون بشرته و العصابة الشريرة التى تنتمى لحزب أعداء النجاح المطالب برأسه !

ذهبت للعنوان المرفق و تقدمت للوظيفة .. و لم لا ؟ .. استوعبت منذ زمن حقيقة أن فكرة عملى كمحاسب كما تقول شهادة تخرجى تنتمى لروايات الخيال العلمى .. و لقد كنت أقضى أغلب وقتى بعد تخرجى فى ال " جيم " حتى أصبحت شديد الشبه بالغوريللا .. عادى جدا .. شاب خريج كلية تجارة يعمل غوريللا .. أأأأه .. بودى جارد عند مطرب شهير .. و بالفعل فزت بالوظيفة ..

دوما كنت أعتقد أننى سأصبح وزيرا أو أتولى منصبا قياديا .. نعم .. و لو لم أتول أنا المراكز المرموقة فمن يتول اذن ؟! .. من المستحيل أن يضيع كل ما اكتسبته هباء .. روايات نجيب محفوظ و كتب جمال حمدان .. عبقرية مصطفى محمود و تفرد أحمد خالد توفيق .. تمرد أمل دنقل و جنون محمد منير .. روعة محمد صبحى و دهشة محمد المخزنجى .. كل هذا الخليط داخل هذه الرأس .. اذن فلأعش مطمئنا .. لن يكون منصب رئيس الجمهورية هو أخر طموحاتى بالتأكيد !!

بالطبع اكتشفت أننى كنت أحمق .. فبعد كل ذلك أصبحت مجرد حائط بشرى لحماية هذا الكائن الذى أشك فى استطاعته كتابة اسمه بدون سبعة أخطاء املائية على الأقل !

كرهته لأننى أشعر دوما بأنه سلبنى حقى .. لم أحقق ذاتى فى أى شىء رغم أنى أملك الكثير لأقدمه .. بينما حقق هو ذاته فى كل شىء رغم أنه لا يملك أى شىء ليقدمه ..

حتى على المستوى العاطفى .. أنا الذى لم تحبنى فتاة طيلة حياتى بينما تنهال عليه الفتيات عناقا و تقبيلا فى الحفلات و المهرجانات ..

و لكنى و أخيرا .. وجدت شعاعا من الأمل وسط كل هذا الظلام .. وجدته و لن أتركه يضيع بسهولة .. فليصبح هو غايتي فى الحياة و لأثبت لنفسى من خلاله أنى لا زلت انسانا ..

أجمل من رأيت فى حياتى .. تلك المخلوقة الملائكية الهشة .. جائت هى وعائلتها مؤخرا ليسكنوا فى المنزل المجاور لى .. كم أن ابتسامتها دافئة ! .. كثيرا ما منحتنى تلك الابتسامة و هى تنظر الى فى خجل .. حتى بادرت و تحدثت معها .. صارحتها على الفور بحبى لها فأطرقت فى حياء و ابتسمت ..

سأكون أسعد كائنات الأرض لو أكملت بقية العمر بجوارها .. بالتأكيد هى تحبنى .. كل نظراتها و تعبيرات وجهها تؤكد ذلك .. رتبت لقاء معها اليوم سأخبرها فيه باستعدادى للقاء والدها ..

_ جواز ؟! .. بصراحة انا عرفت انك شغال بودى جارد عند < .... > و كنت عايزه اعرف اذا كان ممكن يعنى تخليني اقابله .. انا بجد بموت فيه .. أدفع عمرى كله واقابله .. رحتله كل حفلاته و برده معرفتش اكلمه .. أكيد معاك نمرة موبايله صح ؟ .. ايه مالك .. مش بترد ليه ؟!

******************

اليوم التالى .. خبر صغير فى مجلة غير شهيرة ..

( انتحار بودى جارد المطرب الشهير < .... > ولا تزال الدوافع مجهولة ) !!

أربع تاجات مرة واحدة ؟ .. أحمدك يا رب !!

انا عارف ان انا قليل الذوق اوى لانى اتأخرت كتير جدا على اجابات التاجات دى .. بس و الله يا جماعه غصب عنى مش بمزاجى .. و يا ريت مش تزعلو منى .. المره دى بقى جالى 4 تاجات مره واحده .. اربعه .. ده انا مكنتش مصدق نفسى لما جالى اول تاج .. انما واضح انها فتحت بقها !

هناخدهم بقى حسب ترتيب الاهدائات واحد واحد كده .. و يا رب تستحملونى عشان كلها اسئلة عن شخصيتي و حاجات كده برده .. أمرنا لله ..

أول تاج من صديقي و زميل على حريتنا عبد الله غنيم .. بشكره اوى و من تانى بعتذرله عشان هو اكتر واحد اتأخرت عليه .. الاسئلة اللى مع التاج كالتالى ..

هل سبق أن فكرت في أفعال مجنونة ؟

القريبين منى على المستوى الشخصى يعرفو كويس ان السؤال كان المفروض يكون ( هل سبق أن فكرت فى أفعال عاقلة ؟ ) ! .. عموما انا الطبيعي بتاعى ان افكارى بتبقى .. احم .. غريبه شويه ..

هل نفذت احد هذه الافعال ؟

ايون فى الغالب لما الواحد بتطق فى دماغه حاجه بيعملها .. و مش بيفكر كتير فى نتايجها حتى لو عارف ان نتايجها هتبقى سوده فوق دماغه ..

ما هو رد فعل من عرف بتلك الافعال ؟

و الله ناس كتير بتقعد تقوللى انت عبيط .. انت هتضيع نفسك .. يا ابني اعقل شويه .. حاجات كده يعنى ..

هل علم بها احد ؟

ايون ما كله بيبقى ع المكشوف .. احنا بتوع الشفافية !

ما هو احساسك بعد ان قمت بأحد الافعال المجنونه ؟

يعنى .. ساعات اندم .. ساعات اضحك .. حسب بقى اللى بيحصللى بعدها ..

هل ندمت على فعل جنوني قمت به كاد أن يودي بحياتك ؟

لا حكاية يودى بحياتى دى حصلت مره واحده بس مندمتش ولا حاجه .. قعدت اضحك بعدها .. انما انا ندمت على حاجات كتير عبيطه عملتها يعنى ..

هل سبق و وقفت أمام مرآة لتقول لنفسك أنك مجنون ؟

يااااااااه .. كتير جدا ..

كده التاج الاولانى اسئلته خلصت .. التاج التانى بقى كان من صديقي مراد ( ميرو ) صاحب مدونة من أجل البشرية المعذبة .. اسئلته صعبه اوى بس برده بشكره كتير و بعتذرله اوى عشان اتأخرت عليه كتير .. الاسئلة اهى ..

لو أعطيتك ثلاث وردات من هم الثلاث الأشخاص اللى هتهديهم الورد اللى معاك ؟

ههدى واحده لاختى العزيزة جدا جدا نودى .. و التانيه لدعاء عمرو ( يا رب حتى تكون جابتلى سبحه ! ) .. و التالته لدكتور احمد خالد توفيق ..

لو أعطيتك ورقة بيها 3 سطور وقلت لك أكتب فيهم اللى أنت عيزه هتكتب إيه ؟

هكتب : ( اللهم أحينى ما دامت الحياة خيرا لى .. و أمتنى ما دام الموت خيرا لى ) ..

ما هو هدفك فى الحياة ؟

ما انا لو قلت مش عارف هبقى انسان تافه بقى و ماليش هدف و عايش كده و بتاع .. بس انا فعلا مش عارف حاجه معينه .. بس اقدر اقول نفسى اعيش مبسوط و خلاص ..

إن شاء الله بكرة هيكون أحسن من النهارده .. هل تصدق هذه المقولة ؟ ولماذا ؟

ده يتوقف على حاجات كتير و ظروف كتير ممكن تتغير .. الله اعلم بقى هتتغير للاحسن ولا للاوحش .. بس انا مش متفائل ..

أجمل مقولة سمعتها فى حياتك ؟

لالا كده هظلم حاجات كتير اوى .. بس فى مقولات كتير اوى سمعتها او قريتها دخلت دماغى و بحبها جدا ..

من المغنى اللى بتحبه أوى و إيه أحلى أغنية ليه بتحبها ؟

محمد منير .. اغنيه واحده ؟ .. لا مقدرش .. منير له اغانى كتير جدا جامده ..

"غزة" تمثل لك إيه فى حياتك ؟

أعتقد ان غزة هى الجزء الأكبر مما تبقى من الكرامة العربية و الاسلامية ..

أعطى لانتمائك لوطنك درجة من مائة ؟

متهيألى مفيش حاجه اصلا اسمها درجه من100 للانتماء .. يعنى ايه دى ؟! .. اعتقد فى واحد بيحب بلده و واحد مبيحبهاش مع انى لسه مشفتش اللى مبيحبهاش ده و ان تظاهر بذلك ..

لو تزوجت و أنجبت بنتين و ولدين أى الأسماء تختار لهم ؟

الولدين .. مصطفى و عبد الرحمن .. البنتين .. مريم و ايمان ..

غشيت فى أمتحان و انت صغير ؟

أساسى يعنى .. و وانا كبير كمان .. اكدب يعنى ! ..

لو أتعرض عليك رشوة كبيرة و انت فى زنقة ماليه هتعمل إيه ؟

فى كلمه قريتها و مش هنساها .. أكثر مخلوقات الله هشاشة هى الفضيلة التى لم تختبر بعد ! .. الطبيعي انى ارد دلوقتى و اقول اكيد مش هاخدها و المبادىء و القيم و و .. لكن وقت الاختبار العملى الحقيقي الله اعلم ايه اللى ممكن اعمله .. فاكيد بدعى ربنا يثبتنى فى الاوقات الصعبه .. ده اللى اقدر اقوله ..

قول 3 صفات ب 3 كلمات بس توصف بيهم شخصيتك ؟

متبرقل .. جرنشوف .. ليظوك ..

اول مرتب ليك وكان كبير يكفي تجيب اغلى هدايا هاتجيب لكل فرد في عيلتك ايه ؟

مش جايب انا حاجه لحد .. انا هدلع نفسى بقى ده اول مرتب ..

ايه المجال اللى غير دراستك و شايف نفسك فيه قوي ؟

انا نفسى اطلع حاجات كتير كده مع بعض .. يعنى مش مستعد اتنازل عن اى حاجه .. و انا عارف ان فى الاخر مش هعمل اى حاجه منهم اساسا .. مالها قعدة القهوة و الله زى الفل !

بتحب السفر؟

ايون بس لاماكن بحبها بقى .. مش السويس و الخنقة ..

طب دلوقتى حالا ايه المكان اللى نفسك تكون فيه ؟

نفسى اروح كوالالامبور جدا .. بيقولو جامده ..

ياااااااااه اخيرا الاسئلة خلصت .. انا ههدى التاجين دول بقى للعسوله برنسيس بيري و للعزيزة جدا انجى ابراهيم ..

التاج التالت بقى من بيري .. انا بشكرها اوى ع التاج بس هو اسئلته نفس اسئلة اول تاج جالى بتاع دعاء مواجهات اللى هو اتكلم عن نفسك و كده .. فاكيد مش هقول تانى عشان الناس كده هتضربنى ..

التاج الرابع من انجى ابراهيم .. بشكرها جدا جدا ع التاج بس هو برده اسئلته نفس اسئلة التاج التانى اللى جالى من دكتور هيما .. يلا بقى يا اوجى معلش هتكلفى نفسك و تنزلى تقرى الاجابات من تحت !

و اخيرا .. متشكر اوى ليكو كلكو يا جماعه انكم استحملتونى كل ده .. و بشكر تانى كل واحد دخل المدونه هنا و قرا كلمه فيها عجبته او معجبتوش .. و كل سنه وانتو طيبين كلكو .. باقى شهر و نص بس على رمضان .. مسلسلات بقى للصبح !

عنصرية البالون و القلم الرصاص !!

بالتأكيد كلنا يتذكر الأزمة التى زامنت القرار الباهت الذى اتخذه نقيب الممثلين أشرف زكى بمنع الممثلين العرب من أداء أكثر من عمل فى مصر فى العام الواحد .. أغلب الأراء كان معارضا صارخا للقرار و البعض كان مؤيدا بشدة .. لاحظت _ و الله ملاحظة بريئة _ أن أغلب المؤيدين كانوا من الممثلين المصريين أنصاف الموهبة قليلي الظهور فى الأعمال الفنية .. و عموما ليس موضوعى الأن هو القرار أو ما ثار حوله .. فقد تم قتل ذلك بحثا و مناقشة و دراسة و فحص و محص و كأنهم يبحثون عن حل لقضية الشرق الأوسط ..

الموضوع بدايته معى كانت عندما شاهدت ذلك البرنامج " التحفة " ( ايه النظام ) .. هو برنامج يقدمه حسين الامام ولا يمكن وصفه سوى بأنه برنامج خفيف ولا يمكن الوقوف عنده كثيرا .. حسين الامام كان من أشد المؤيدين _ بالطبع _ لقرار أشرف زكى .. و كان فى تلك الحلقة يستضيف عدد من الممثلين الشباب المصريين الذين لا أذكر أسماؤهم ..كان يحاول بكل شراسة أن يثبت أن القرار حكيم و صائب و يحقق عدالة الله فى الأرض .. حتى وصل به الأمر الى هذا الحوار ..

حسين : " هو يعنى تيم حسن يعرف يعمل فيلم زى كده رضا ؟ "

أحد الممثلين الشباب : " لاااااء .. طبعا ميعرفش " ..

_ " أحمد حلمى بقى يعرف يعمل الملك فاروق ! " ..

_ " ااااااااه .. طبعا يعرف !! " ..

( همهمات اعتراض من الجمهور فى البرنامج )

حسين : " أيوه يعرف يعمله طبعا و يعمله كمان احسن من تيم بكتير .. و انا شخصيا اتحدى ان انا اعمله احسن من اى حد !! "


حوار سخيف عقيم كان الأولى أن يصدر من صبية قليلى التهذيب يحاولون استعراض عضلاتهم أمام بنت الجيران لينالوا اعجابها و يخرجون ألسنتهم لبعضهم البعض لا أن يدور فى برنامج تليفزيونى على قناة يشاهدها الملايين ..

أحب أحمد حلمى كثيرا و أحب أفلامه .. و شاهدت مسلسل الملك فاروق و أجده مسلسلا رائعا .. تيم حسن كان متألقا و أعتقد أنه بالفعل ممثل عظيم الموهبة .. و لكن أعتقد أنه من المعروف للجميع أن حارس المرمى الجيد لا يمكن أبدا أن يكون مهاجما جيدا و العكس .. حلمى و تيم كلاهما موهوبان و لكن كل فى مكانه و منطقته .. و لكن حسين الامام هدم كل المنطق فى عباراته التى _ غالبا _ لم يكن يعيها .. بمنتهى البساطه قرر أن تيم لم يؤد الدور كما يجب و أنه كان من الممكن أن يؤديه أفضل منه .. بخس حق و موهبة الرجل لمجرد أن يثبت أنه موهوب .. بالعافية موهوب .. نفى كل ابداعه و أدائه الراقى ليثبت أنه أفضل منه .. لا بل ليثبت أن المصريين أفضل من السوريين ..


هذا الحوار قاد ذهنى الى التفكير فى أشياء عديدة أصبحت من المسلمات و أصبحنا نفعلها كل يوم دون أن تثير حفيظتنا أو نتوقف قليلا لنفكر فيها ..

نحن _ معشر العرب _ نملك قدرا مهولا من العنصرية ضد بعضنا البعض .. غير الخليجي ينظر للخليجي باعتباره بالون مغرور عديم العقل يرتدى الجلباب و غطاء الرأس و يبذر أمواله الطائلة فى كل مكان .. غير السودانى ينظر للسودانى باعتباره قلم رصاص أسود نحيل قليل الذكاء جائع دائما يبحث عن الرزق بأى وسيلة .. حتى فى أفلامنا المصرية يظهر السودانى دائما فى دور الخادم و توجه له الجملة الخالدة : " روح اندهلى سيدك ! " .. غير اللبنانيين ينظرون للبنانيين باعتبارهم رجال مائعين و " ملعوب فى أساسهم " و متحررين زيادة عن اللزوم .. الخليجي ينظر لبقية العرب باعتبارهم أوباش فقراء حقودين يأتون بلاده ليعملوا بالأجرة عنده و يتمنى لو استيقظ يوما ليجدهم زالوا من الوجود .. اللبنانى ينظر لبقية العرب باعتبارهم متزمتين و رجعيين .. دعك طبعا من الضغائن المتبادلة بين اللبنانيين و السوريين .. و بين الكويتيين و العراقيين .. و بين المصريين والليبيين .. و بين حسين الامام و تيم الحسن !!

نحن نضطهد بعضنا البعض و لو على المستوى الفكرى .. نحن عنصريين جدا بطبعنا .. حاول أنه تضبط نفسك و أنت تسخر من السودانى الذى يبيع الولاعات جنب بيتكم أو الخليجي الذي رأيته هنا أو هناك فى أحد شوارع القاهرة و ستدرك ما أقول .. نحن العرب نصرخ و نملأ الدنيا عويلا و نشكو دائما كوننا مضطهدين فى كل مكان من أمريكا الى أوروبا الى جميع دول العالم .. و نحن نحمل داخلنا أضعاف هذا الاضطهاد ضد بعضنا البعض ..

دائما ما نغنى و ننشد و نعوى و نصرخ مطالبين بضرورة تفعيل الوحدة العربية و بأننا شعوب شقيقة .. نهتف و نسب رؤساء دولنا _ بغض النظر عن أنهم جميعا يستحقون كل هذا السب _ لأنهم لا يملكون قرارا واحدا مشتركا و لا يستطيعون توحيدنا تحت راية واحدة .. و نحن أساسا لا نحترم بعضنا على الاطلاق و لا ننظر لبعضنا نظرة احترام .. نعتبر دائما علاقتنا تضاربية لا تكاملية ..

المشكلة ليست دائما فى الرؤساء وحدهم .. المشكلة داخلنا جميعا .. فلنحاول جميعا اعتبار أنفسنا كيانا واحدا .. فلنذيب كل تلك الخلافات و الفروق الشخصية قبل أن نطالب رؤسائنا بذلك .. فلننظر لبعضنا نظرة احترام أو حتى نظرة قبول .. و ليقوم حسين الامام بدور الملك فاروق و يبقى يقابلنى لو حد اتفرج عليه !!

رسالة كراهية حارة صادقة !!

بدون مقدمات .. أعلم تماما أن هذا الموضوع قد تم طرقه عشرات المرات من قبل و ربما مئات .. أعلم تماما أن أى طفل رضيع فى مصر الأن يعرف أن أحمد عز محتكر و فاسد و فلوسه حرام .. أعلم تماما أنكم جميعا ربما يكون قد أصابكم الملل من كثرة الحديث عن هذا الأمر دون أى نتائج تذكر .. و لكن فى بعض الأحيان تصل الصفاقة و البجاحة وقلة الدم الى مرحلة لا يمكن السكوت عنها .. حاولت اعدى الموضوع و متكلمش لكن مقدرتش .. سبق السيف العزل ..

لا أستطيع أبدا وصف احساسى عندما سمعت تفاصيل هذه الكارثة .. سمعتها فى برنامج ما على لسان مذيع ما .. ولكن من الممكن أن أقول الأن مطمئنا أننى لن أضار أبدا لو رأيت العزيز أحمد عز يتم سلخه حيا فى ميدان عام .. تتهمنى بالسادية ؟! .. نعم لقد أصبحت ساديا .. ارتحت يا سيدي ؟ .. ما هو اللى بشوفه فى البلد دى مش شويه والله !

القصه كما يلى .. هناك قانون فى مصر لمنع الممارسة الاحتكارية .. كانت هناك مادة فى القانون تنص على أن المحتكر يدفع للدولة _ على سبيل العقاب المادى _ 300 مليون جنيه أو 15 % من الأرباح أيهما أكبر .. يعنى لو النسبة أقل من الـ 300 يدفع الـ 300 .. لو النسبة أعلى من الـ 300 يدفع النسبة حتى لو وصلت مليارات .. طيب دى حاجه كويسه .. الحكومه شغاله اهو يا جدعان !

كانت هناك مادة أخرى تسمى شاهد الملك .. تنص على أنه لو أبلغ شخص ما يعمل فى شركة ما عن مستندات أو أدلة تدل على فساد هذه الشركة .. يتم التعامل معه باعتباره شاهد ملك و لا تتم معاملته كشريك فى هذا الفساد .. و يحميه القانون تماما .. و هى مادة تشجع بالطبع على ايقاظ ضمائر البعض و تشجعهم على شهادة الحق دون خوف و القانون فى صفهم .. برده شىء رائع ..

اللى حصل بقى كالأتى .. من كام يوم فى مجلس الشعب اجتمع أحمد عز بالنواب و تم اقتراح الغاء المادتين اللى لسه مكلمكم عنهم دلوقى !!!!! .. الغاء شاهد الملك .. يعنى اللى هيبلغ بعد كده هيتسحل .. و الغاء نسبة الـ 15 % و الاكتفاء بالـ 300 مليون جنيه .. يعنى مهما سرق مش هيدفع غير الـ 300 مليون اللى هما بالنسباله فكة بالمناسبة !!!

تم تمرير الاقتراح على النواب الذين كان أغلبهم من الحزب الوطنى بالطبع .. ها موافقين يا جدعان .. كله رفع ايده طبعا .. دوى الصوت المألوف من الأخ الغالى أحمد فتحى سرور .. موااااافقة .. هييييييييييييييييييييه !

تم كل ذلك فى غياب وزير الصناعة و التجارة رشيد محمد رشيد بسبب سفره الى الخارج .. لأنه من القلائل المحترمين فى الحكومة و بالطبع لم يكن ليوافق على حدوث هذه المهزلة .. وقد هدد الرجل بالاستقالة فعلا بعد عودته الى مصر ردا على هذه الكارثة .. أحمد عز لعبها صح أوى .. استغل فرصة غياب الراجل المحترم و طبخ الطبخه فى ظل وجود اقفاص الجوافه من أمثال أحمد فتحى سرور و زكريا عزمى و نواب الحزب الوطنى الأفاضل .. تتهمنى مرة أخرى بالوقاحة ؟! .. لنكن منصفين قليلا و لنوجه تعبير الوقاحة و الصفاقة لمن يستحقه .. فى اللى أوقح منى بكتير أوى فى البلد دى !!

أحمد عز .. يمكن القول أن هذا الـ ( رجل ) أقوى رجل فى مصر حاليا .. رجل فوق القانون .. لا هو ليس فوق القانون بل هو من يضع القوانين فى مصر أساسا .. يفصلها على مقاسه .. هذا الرجل يحكم مصر الأن فعليا .. ولا عزاء لحسنى مبارك !

فلينهب أحمد عز و يسرق و يمتص دماء الشعب كما يحلو له اذن .. فقد تم وضع قانون يسرى على 80 مليون مصرى من أجل سواد عيونه .. و لسان حال الحكومة ينطقها واضحة .. أيها المواطن المصرى .. فلتذهب الى الجحيم !! .. فى ستين داهية الشباب الغلابة اللى عايزين يتجوزو و مش لاقيين شقة .. المهم أحمد عز .. فى ستين داهية ارادة و رغبة 80 مليون مصرى .. المهم أحمد عز .. فى ستين داهية نواب المعارضة و أقلام الشرفاء و دفاعهم عن حقوق الناس .. المهم أحمد عز .. طب ما نغير بقى اسم الجمهورية و نخليها جمهورية أحمد عز العربية .. و ربنا هى دى اللى ناقصة !

الأغرب من كل هذا أننى بعد ذلك شاهدت فى أحد البرامج من يدافع عن أحمد عز .. وكيل اللجنة الاقتصادية فى مجلس الشعب .. هو رجل لا يمكن وصفه سوى بكلمة من 4 حروف لن أذكرها هنا .. يدافع بكل ضراوة عن القانون الجديد و يبرر و يراوغ و يتطاير اللعاب من بين شدقيه .. كان نفسى المذيع ساعتها يسأله سؤال واحد بس .. هو مقبضك كام ؟؟

فى النهاية أريد أن أقول مباشرة لأحمد عز .. أنا ألعنك و ألعن اليوم الذى ولدت فيه و ألعن الحكومة التى تدعم فسادك و ألعن الرئيس الذى تركك تقتل أبناء وطن من المفترض أنه يحكمه .. و غير أسف بالمرة على وقاحتى .. و انا لله و انا اليه راجعون .. هتوحشونى كلكو والله يا جماعة !

عن جنة و دجاج كنتاكى و المسوخ و أشياء أخرى !!

منذ ما يقارب الأسبوعين كنت أشاهد برنامجا تليفزيونيا .. و قد أعلنوا فى بداية الحلقة أنهم سيستضيفوا أصغر كاتبة فى مصر .. بالطبع جذبنى الخبر جدا و شعرت باعجاب مبكر بهذه الطفلة الموهوبة من قبل أن أراها أو أعرف حتى ماذا كتبت .. و دارت فى ذهنى تساؤلات عديدة حول عمر هذه الكاتبة و شكل و نوعية ما تكتبه .. و جلست أنتظر حتى تبدأ الفقرة الخاصة بها ..

عندما بدأت الفقرة .. افتتحها المذيع متشدقا _ كالعادة _ بمصر الولادة و بالمواهب الذهبية التى تتألق و تظهر من وسط عمق أعماق طمى نيل مصر و ما الى ذلك .. و قال أن الطفلة ( جنة جوهر ) البالغة من العمر عشر سنوات سوف تصبح امتدادا ليوسف ادريس و نجيب محفوظ .. و لكنى _ وللأسف _ اكتشفت أن ذلك لن يحدث ابدا ! .. ليه ؟؟ سؤال وجيه فعلا .. بص يا سيدي ..

جنة _ الطفلة المصرية السمراء الرقيقة _ ألفت رواية للأطفال بعنوان ( Sharktanic ) .. تيمنا بالقصة الشهيرة الخاصة بالسفينة تايتانيك .. و قد تم نشر الرواية بالفعل .. و الرواية باللغة الانجليزية ان كنت لم تلاحظ ذلك !

جنة لم تتكلم طوال اللقاء ثلاث كلمات عربية متتالية ! .. فجنة _ عقبال عندكم _ تدرس فى مدرسة تجريبية باللغة الانجليزية ..

جنة عندما سألها المذيع عن امكانية أن تكتب روايات أخرى بعد ذلك باللغة العربية نفت ذلك بعفوية و براءة شديدتين ! ..

والدتها بررت ذلك بأنها حاولت قبل أن تدخل جنة المدرسة ألا تعلمها أى كلمة انجليزية .. و لكن تأثير المدرسة كان طاغيا .. و تم اجهاض كل محاولات الأم ..

عرفت بقى دلوقتى ليه بقوللك ان جنة لن تصبح امتدادا ليوسف ادريس و نجيب محفوظ .. يمكن بالأحرى أن تصبح امتدادا لأجاثا كريستى و ج . ك . رولينج !

بعد ما شاهدت ذلك ترددت داخلى هذه العبارة : " لقد نجحتم .. نجحتم تماما و ظهرت ثمار نجاحكم واضحة .. "

نعم .. فقد نجحوا فى تحويلنا الى نسخ أخرى سخيفة مكررة منهم فى كل شىء .. نجحوا فى افقادنا هوياتنا و شخصياتنا المستقلة .. هم أرادوا ذلك و حققوه بنجاح منقطع النظير ..

نحن نأكل البورجر و نحب دجاج كنتاكى .. فلتجربه .. بالتأكيد سيروق لك ..

نحن نتابع الدورى الانجليزي و نعشق ديفيد بيكهام .. لابد أن تحبه أنت أيضا وترتدى تى شيرت يحمل اسمه ..

نحن نعشق براد بيت و أنجلينا جولى و جون ترافولتا .. لماذا لا تنبهر بهم مثلنا و تشاهد كل أفلامهم ؟

نحن قوم متحررون لا نرتدى الملابس الثقيلة ولا نضع أقمشة على رؤسنا .. فلتخلعوا ما ترتدونه و لتدعوا مثلنا للحرية و الانطلاق ..

نحن نؤمن بالحرية الجنسية .. كيف تتحملون أن تعيشوا فى هذا السجن و وسط هذا الكبت .. فلتمارسوا الجنس مثلنا على الأرصفة و فى الطرقات و الأماكن العامة ..

نحن نحلم و نفكر بالانجليزية .. فلتحلمى يا صغيرتى أنت أيضا بلغتنا و لتتخيلي و تفكرى بأسلوبنا و لتكتبى رواياتك على نهجنا ..

ألا بارك الله فى العولمة !

لقد أخطأت والدة جنة عندما تخيلت أن الطريق للحفاظ على" دماغ " ابنتها هو ألا تعلمها الانجليزية حتى سن الالتحاق بالمدرسة .. بالطبع ليس هذا هو الحل .. فلتتعلم الانجليزية كما يحلو لها و لتشاهد و تقرأ كل الثقافات و تنفتح على كل الخبرات .. و لكن كان يجب قبل كل ذلك ان تتعلم جيدا ما هى اللغة العربية .. ماذا تعنى لنا لغتنا .. كيف أن لغتنا هى القالب الذى نصب فيه أفكارنا و تاريخنا وثقافتنا .. يجب أن تتعلم جيدا ما هو الأدب العربى .. ماذا يعنى نجيب محفوظ و يوسف ادريس .. ماذا يعنى صلاح جاهين و أحمد فؤاد نجم و أمل دنقل .. ماذا تعنى عائشة عبد الرحمن و سحر الموجى .. يجب أن يروى لها تاريخ أجدادها العرب .. تاريخ النضال و الشرف .. تاريخ كتاباتنا و أدبنا الذى أنار العقول الغربية كلها و دفع بها الأن الى القمة .. تاريخ المجد و العزة و الكرامة التى محاها الزمن ..

جنة تنتمى الى جيل مظلوم أصبح ضحية لما يسمى بالعولمة .. جائوا الى الدنيا ليجدوا بلادهم فى قاع العالم فكريا و اقتصاديا .. و ليجدوا الغرب فى ألمع صوره و أكثرها بريقا و جاذبية .. يجب الا نتركهم تحت براثن هؤلاء .. فلننقذ ما يمكن انقاذه قبل أن يتحول كل شبابنا الى مسوخ ..

أدعو الله أن أرى الروايات القادمة لجنة باللغة العربية .. أراها تكتب لأهلها و ناسها .. تتحدث بلسانهم و تنطق بمشاكلهم .. تشعر بما يشعرون به و تحلم كما يحلمون .. لا كما يحلم مايكل و تشعر مارثا و يريد العم سام !

.................................

نشر فى جريدة الدستور ..

تاج تانى ؟؟ .. يا سبحان الله !

الحقيقة انا كنت فاكر ان التاج اللى فات بتاع دعاء مواجهات ده كان هيبقى أول و أخر تاج .. قلت مين يعنى اللى هيهديني تاج تانى .. اكيد مفيش ..

بس من شدة دهشتى و اذبهلالى جالى تاج تانى .. جالى من زميل مدون عزيز هو الدكتور هيما .. صاحب مدونة المرحوم فى التلاجة .. و مدونته _ كما هو واضح من اسمها _ بتتميز بجو غريب من التفاؤل و البهجة و الانشكاح .. بس فعلا مدونة قيمة يا جماعة و لازم تحودو عليها ..


انا يا جماعة عندى مشكلة مع التاجات دى .. اصل بيبقى معاها اسئلة صعبة جدااااااا .. بتسألنى بقى عن نفسى و جوايا و أحلامى و حاجات كده كتير برا المنهج .. و تاج هيما مليان اسئلة و كلها كومبليكس .. الاسئلة دى بتخليني اتأكد فعلا ان انا معرفش اى حاجه عن نفسى .. بس برده هحاول اجاوبها يعنى عشان خاطر هيما .. مع انى معتقدش ان فى حد عايز يعرف اى حاجه عنى اساسا ..

السؤال الأول .. أذكر خمس أحلام على الاقل .. تخص ماضيك وتحلم فيها بتغيير اشياء .. ماذا ستعدل وماذا ستترك ؟

شايفين السؤال ؟؟ .. اموت و اعرف الناس دى بتجيب الاسئلة دى منين .. استعنا ع الشقا بالله !

انا كنت زمان بحلم اطلع ظابط و اشيل مسدس بقى وبتاع ( يعنى زى كل العيال الصغيرة ) .. كنت بحلم كمان اطلع جراح .. مش عارف ليه بصراحة بس يمكن كان عندى ميول دموية شوية ! .. كنت بحلم يبقالى أخ أو أخت صغنتوته العب بيها .. كنت بحلم كمان اكبر و ادخل كلية و كده ( اه كنت عبيط ) .. كمان كنت بحلم انى اطلع مخترع من اللى بيطلعو فى الافلام الاجنبى دول شعرهم منعكش و هدومهم مقطعة و بيصرخو على طول و اخترع حاجات كتير غريبة ومالهاش أى لزمه ! .. و كفاية دول بقى مش فاكر حاجه تانى ..

السؤال الثانى .. اذكر خمس أحلام على الأقل تخص مستقبلك ..

بحلم انى ابقى حد مش زى اى حد .. يعنى يبقالى قيمة و دور .. فى ايه بقى بالظبط مش عارف .. بحلم انه ربنا يرزقنى بالصحة لحد ما اموت .. بدعى ربنا ديما انه يسعدنى فى الدنيا وفى الأخرة .. بدعى ديما كمان ان ربنا يحبب الناس فيا .. بحلم اتجوز واحدة زى القمر ( اه انا حر بقى ) و تكون زى العسل و دمها خفيف و رقيقة و بريئة و دماغها حلوة و فهمانى .. يعنى تقريبا كده مش هتجوز خالص .. بحلم ولادى يبقو عيال م الاخر .. يعنى مفيهمش غلطة .. بحلم اشوف بلدنا نضيفة و عزيزة و عندها كرامة و شرف .. بحلم لما اقرا الجرنال بعد تلاتين سنة ملاقيش أول خبر ( الرئيس مبارك يفتتح معرفش ايه فى مدينة المش عارف ايه ) .. ما هم هيقولو عليه مبارك برده .. كلها احلام صعبة بس مفيش حاجه بعيدة على ربنا ..

السؤال الثالث .. أذكر شخصين على الأقل متواجدين فى حياتك حاليا .. كنت تود وجودهم قبل الآن بزمن ..

جينا للاحراج بقى .. هو بصراحة مش شخصين بس هما ناس كتير اوى كلهم غاليين عليا اوى و كنت اتمنى فعلا انى اعرفهم من زمان .. بس معلش متعوضة ان شاء الله .. و مش هقول أسامى بقى يا عم عشان مش هنخلص كده ..

السؤال الرابع .. أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا ..

الأستاذ ياسر .. كان أستاذى و انا فى اعدادى ( انجليش بالمناسبة ) .. كنا اصحاب جداااااااا فوق ما اى حد ممكن يتخيل .. كنا بنحكى لبعض كل حاجه و اى حاجه .. هو شاب زى العسل و شخصية محصلتش .. دلوقتى برده بنتقابل ساعات بس للاسف مبقتش العلاقة زى زمان لان الظروف مبقتش تسمح .. و مش فاكر حد تانى ..

السؤال الخامس .. تهدى التاج لمين ؟؟

ايوه كده بقى هى دى الاسئلة .. انا ههديه لناس كتير عشان بجد عايز اسمعهم بيتكلمو عن نفسهم شوية .. و عشان انا بحبهم اوى .. بهديه لكل من ..

ميرو .. هيرو .. غادة و رفيدة .. قطة الصحراء .. برنسيس بيري .. ايمو برميل فاضى .. الرقيقة سارة البحر .. الرائع أسامة ياسين ..

و تحياتى لكل الناس ..

أفرام و السادات .. ربنا يهنيكو ببعض !!

كانت مباراة ممتعة فعلا .. كانت تحمل الكثير من الحماس والندية .. و لم تحسم فى النهاية الا بركلات الجزاء ..

منذ البداية كنت أشجع مانشستر يونايتد بكل حواسى .. لثلاثة أسباب .. لأننى أحب فريق مانشستر .. و لأننى لم أستطع أبدا طيلة حياتى أن أحب فريق تشيلسى .. و لأن المدير الفنى لتشيلسى ( أفرام جرانت ) اسرائيلي الجنسية .. و سعدت كثيرا بالفعل بعدما فاز مانشستر بالمباراة و بالكأس ..

فيما بعد قرأت أنه قد تم عقد مؤتمر صحفى قبل المباراة .. ذكر فيه أفرام _ ولا اعرف مناسبة ذلك _ أنه يضع فى منزله صورا لبعض القادة الذين يحاول استلهام نجاحاته من أعمالهم .. ذكر منهم غاندى و تشرشل و محمد على كلاى و مارتن لوثر كينج و .. أنور السادات !!

و أضاف أن هذه الشخصيات عظيمة لأنها واصلت المشوار الى النهاية و استطاعت تحقيق انجازات كبيرة ..

كويس خالص .. الحقيقه كلمات الراجل ده خلتنى اخد قرار انى اقول كلام نفسى من زمان اقوله .. بس كنت ساعات بلاقى مفيش فرصة أو اقول مش دلوقتى خليها بعدين .. بس الاخ أفرام يشكر بقى هو اللى ولعها .. و يمكن كلامى ده مش هيعجب ناس كتير .. بس كل واحد له الحرية فى انه يعبر عن رأيه .. احنا ناس ديمقراطيين .. وهنتناقش ..

أرى أن مصر الان _ بلا فخر _ من نوادر الدول التى بائت بوصمتى عار و ليس وصمة واحدة كأغلب دول وطننا العربى ..

دعنا نرى دولا مثل سوريا و لبنان و العراق ( عراق ما قبل الغزو الأمريكي تحديدا ) .. دول تعانى كثيرا على مستوى الداخل .. مواطنين لا يعيشون فى مستوى اقتصادى أو اجتماعى مناسب .. لا وجود للديمقراطية .. أو بشكل أدق هناك ديكتاتورية تسحق حقوق المواطنين .. ولكنها رغم ذلك دول تحافظ على موقف سياسى خارجى محترم .. موقف يعبر عن شموخ و عدم خضوع .. وكلنا يعرف صراعاتهم مع أمريكا و اسرائيل طيلة السنوات الماضية ..

على الجانب الاخر نرى دولا مثل السعودية و الكويت و قطر و البحرين و الأردن .. دول طأطأت الرؤوس منذ زمن .. ارتضت على نفسها الذل والبقاء تحت ضروس اسرائيل و الخضوع لأوامر أمريكا .. مواقفها الخارجية مخزية و غير شريفة .. و لكن فى الوقت ذاته يتمتع مواطنيها داخليا بمستوى اقتصادى محترم ومستوى معيشي متميز يصل لحد الترف والثراء الفاحش .. و يشعرون ببعض الكرامة داخل بلدهم .. يشعرون بأدميتهم ..

أما مصر فهى كالعادة صاحبة الريادة و الموقف المتفرد .. مصر الوحيده التى تعانى داخليا و خارجيا .. بائت بالسوئتين .. فلا المواطنين بالداخل يلقون أى نوع من الاهتمام من حكومتهم ورئيسهم الموقر .. و كلنا يعلم طبعا الظروف الداخلية حاليا بكل ما فيها .. ولا هى أيضا دولة تملك موقفا خارجيا صامدا أو بطوليا يعارض الارهاب الصهيونى أو يدين الامبريالية الأمريكية .. بل على العكس تماما .. فالزعيم و القيادة و العبور للمستقبل كان يهنئهم منذ أيام على قيام دولتهم .. متهيألى مفيش حد تانى غيره من الرؤساء العرب مهما بلغت درجة بجاحته عملها .. ما شاء الله ريسنا متفوق فى المجال ده .. بل و أيضا يصدر لهم الغاز المصرى تقدر تقول ببلاش .. بيدعمهولهم وبيصرف عليه من جيبه _ أو من جيب الدولة متفرقش _ بدل ما يوفر العيش اللى الناس مش لاقيه تاكله هنا .. هو حسنى مبارك رئيس دولة ايه بالظبط ؟!

ما علينا .. فأنا أرى أن السبب المباشر فى ذلك دون أى لبس أو سوء فهم .. هو أنور السادات .. أنور السادات رجل الحرب و ما يسمى بالسلام .. حبيب أفرام .. الرجل حاد الذكاء الذى لم يوجه ذكائه هذا فى الطريق الصحيح ..

بتقول ليه ؟؟

***********************

معاهدة السلام ..

عقد لبيع القضية و المبادىء و الأخوة العربية و كل الأرض فى مقابل الحصول على قطعة منها .. أتكلم هنا من منطلق أن كل أرض فلسطين هى أرضنا .. و ليس فقط سيناء التى لم ننلها كاملة أيضا غير بعد طلوع الروح والجرى فى المحاكم الدولية اللى كانت ممكن بكل بساطة تحكم ان طابا دى مش بتاعتنا و انها بتاعت اسرائيل .. و ساعتها مكنش حد هيفتح بقه ..

أعتقد أن فترة ما بعد حرب أكتوبر مباشرة هى الفترة الوحيدة التى كان من الممكن وقتها أن يتحقق الحلم .. حلم الوحدة العربية الذى أصبح الأن دربا من دروب الخيال .. مصر منتصرة .. الدول العربية ساعدتنا .. فى اللى قطع البترول و فى اللى ساعدنا على خط النار زى سوريا .. حققنا هدفنا اللى كان وقتها بيتقال انه مستحيل و الجيش الذى لا يقهر و مش عارف ايه .. و بعد ما استردينا جزء من سينا .. و بعد ما السادات حس انه مش هيقدر يكمل و خصوصا ان امريكا هتساعدهم .. قال انا مش قد الناس دى و مش هقدر احارب تانى .. و راح الكنيسيت وقاللهم انا اسف والله مكنتش اقصد .. ويلا بقى احط ايدي فى ايديكم و احط دماغى تحت رجليكم ونكتب ورقتين و تدونى سينا و ابقى ابن كلب لو فتحت بقى معاكم تانى .. لا أرى الموقف على ضوء اخر ..

الحق أن الجولان و جنوب لبنان كانوا فى خطة السادات .. و بالنسبة لفلسطين كان الاتفاق على أن تعود اسرائيل لحدود 48 .. و لكن هل هذا يشفع للسادات ؟ .. أنصار المعاهدة بيقولو دلوقتى يا عم يا ريتهم كانو سمعو كلامه .. انت مش شايف اللى بيحصل دلوقتى ولا ايه .. دول بيبوسو ايدين اسرائيل دلوقتى عشان ترجع لحدود 67 و مش راضية كمان .. شفت السادات كان عنده بعد نظر ازاى ..

أرد عليهم أنه من ارتضى على نفسه الانحناء فلينحنى اذن الى الأبد .. السادات بدأ الخضوع والتنازل عن حق ليس ملكه وانما ملك الشعوب و الاجيال التى سيتحمل السادات ذنب ذلها وتشريدها للأبد .. ذهب معترفا بدولة اسرائيل و هو ما يهدم المبدأ من البداية .. لا وجود لدولة تسمى اسرائيل يا رئيسنا السابق .. أنت تريد المصالحة مع كيان هلامى سرطانى خبيث يجب ازالته .. أنت منحته الشرعية بمعهادتك الأثمة .. انحنى السادات فانحنت مصر فانحنى العرب من بعدها ولا زالوا ينحنون .. و اركب يا شمعون ..

***********************

الانفتاح الاقتصادى ..

القرار العبقرى الذى اتخذه السادات فى الوقت المناسب .. أشهد له بذلك و ابصم بالعشره كمان .. فالنظام الاشتراكى الذى كانت تتبعه مصر ما هو الا كذبة ناصرية كبيرة كانت ستؤدى باقتصاد البلاد الى الهاوية ( مع كامل حبى و احترامى للرئيس جمال عبد الناصر ) .. و قد أثبتت النظرية الاشتراكية فشلا مدويا فى موطنها الاصلى و مسقط رأسها بعد انهيار الاتحاد السوفييتي و سقوط رموز الشيوعية ..

و لكن .. هل طبق السادات الرأسمالية فى مصر تطبيقا صحيحا ؟

أعتقد أن الاجابة هى لا .. و الأدلة كثيرة ..

منها أن مصر بيعت قطعة قطعة و لا زالت تباع الى الأن لمستثمرين أجانب لا يهمهم مصلحة الوطن و لا الشعب بالطبع .. و فى ظل غياب مفضوح لدور الدولة ..

منها أن وزير سابق فى حكومة السادات لما صحفية سألته فى حوار لجريدة محترمة و هى المصرى اليوم و قالتله كيف كان السادات يدير شئون الدولة الاقتصادية .. قاللها : كنا بنقعد بالليل و يقوللى احكيلي !! .. رئيس دولة يعتمد على الحواديت فى ادارة اقتصاد بلده .. ما شاء الله .. السادات بطبعه كان سياسى ناجح من الدرجة الأولى و اقتصادى فاشل من الدرجة الأولى أيضا ..

منها أيضا ما نراه اليوم من فئة قليلة تمتص دم الشعب وتستأثر بالمليارات بواسطة الاحتكار و تجويع الغلابه .. زى الأخ احمد عز ( هو طن الحديد عدى التسعتلاف ولا لسه يا جدعان ؟! ) و محمد ابو العينين و بتوع الاسمنت و غيرهم كتير ..

فالرئيس مبارك يسير على خطى السادات و لا يحاول الانحراف قيد أنملة .. فمبارك بطبعه شخصية غير ابتكارية و غير قيادية على الاطلاق .. الأقدار صنعت له طريقا فمشى فيه كما هو و لم يغيره .. أرى أن مبارك ما هو الا ( التطور الطبيعي للحاجة الساقعة ) لا أكثر ولا اقل .. بيبس كولا بيبس !

***********************

أعتقد الأن أنه من الطبيعي جدا أن يحب أفرام السادات .. ولماذا لا يحبه اذن ؟!!

فهنيئا لك بالسادات .. و هنيئا للسادات بحبكم له ..

و كما قال الحديث الشريف ( يحشر المرء مع من أحب ) .. فربنا بقى يرحمه ويغفر له و يسترها عليه .. و يهدى اللى احتل كرسيه من بعده أو يريحه و يريحنا !

مواقف ومخاوف !!

كنت اتحدث مع صديقة سكندرية عزيزة والدتها لبنانية .. حين قالت لى بلهجة يشوبها الحزن : " انا عايزه اقوللك حاجه مبقتش بتكلم فيها مع أى حد من زمان " .. الحقيقة أننى أعرفها منذ فترة لا بأس بها .. كنت أحكى لها وتحكى لى كل شىء .. حتى تخيلت أنه لم يعد هناك أسرار يمكن أن تروى ..

" تعرف يا أسامة ان انا كان عندى أخ " .. فوجئت بشدة عندما سمعت هذه العبارة .. فما أعرفه عنها أنه ليس لها سوى أخت واحدة كثيرا ما كانت تحدثنى عنها .. أكملت : " أيوه متستغربش .. كان عندى أخ بس الله يرحمه .. اتوفى " ..

سألتها عن عمره فأجابت : " كان عنده 6 سنين بس " .. سألتها هل كان يعانى مرضا ما أو توفى فى حادث أو ما الى ذلك فقالت لى : " لأ .. اتقتل ! " .. كلماتها المتتالية كانت تسقط على كالقذائف .. اتقتل ؟! .. طب ازاى ؟ و ليه ؟ و مين ؟!!

" كان مع ماما فى لبنان .. كان ايام حرب لبنان و اسرائيل اللى فاتت .. واتقتل فى غارة اسرائيلية .."

" كان اسمه عمرو .. كنت بحبه أوى و كان بيموت فيا .. كان بينام فى حضنى بالليل .. "

" كل البنات اصحابى كانو حاجزينه عشان يتجوزوه .. شوف صورته .. كان زى القمر .. "

و انطلقت فى بكاء حار مرير ..

********************

جلس نصر يتابع خلسة الحديث الدائر بين الرجلين .. لم يرد أن يتدخل أو يقاطعهما و فضل أن يستمع فقط لما يقال ..

الأول : " عارف يا دكتور .. احنا دلوقتى عايشين فى حالة سلام .. ليه منمدش ايدنا لبعض و نستفيد من بعض على قد ما نقدر .. "

الثانى : " ايوه يا بشمهندس بس هو الدنيا يعنى وقفت على دول .. ما ارض الله واسعة .. هى حبكت ؟! "

_ " يا دكتور اعذرنى انت كده بتتكلم زى اى حد عادى من الشارع .. انت راجل مثقف .. فيها ايه لما نستورد من اسرائيل حاجه او نصدرلها .. طول ما ده فى المصلحة .. انا مثلا فاتح شركة استيراد و تصدير .. و ياما رحت هناك .. يا دكتور اسرائيل دى حته من أوروبا .. بلد جميلة جدا و رائعة فعلا .. "

_ " ................................ "

_ " عارف .. دول بيهتمو جدا بالزراعة .. الناس دول متقدمين جدا فى الحاجات دى وعندهم علماء وخبراء على أعلى مستوى فى الزراعة والمحاصيل .. ليه منستفدش منهم .. الدولة نفسها عاملة علاقات مع اسرائيل و عندنا سفيرهم وعندهم سفيرنا .. ليه احنا كمان منعملش معاهم علاقات .. "

عندما روى لى نصر هذا الموقف .. تمنيت من أعماق قلبى لو كنت مكانه و سمعت هذا الحوار .. كنت سأقترح على هذا الرجل ( أو بلاش الرجل .. نخليها الشخص ) أن يذهب ليعيش هناك الى الأبد طالما هو منبهر بها الى هذا الحد .. و مفيش مانع كمان لو اتجوز واحده منهم و خد الجنسية و خلفو عيال صغننين يعلمهم حب اسرائيل و بذل الغالى و الثمين فى سبيل تحقيق أمنها و رفاهيتها .. اه عادى .. مش بعيد كمان الحكومة تعملله هنا تمثال فى ميدان عام باعتباره بطل قومى ساعد فى توطيد العلاقات بيننا وبين دولة صديقة وشقيقة و ساهم فى نمو نبتة السلام و المحبة بين الشعوب .. وسلملى ع التروماى !

********************

كنت جالسا أتابع الاخبار حين قرأت الخبر ..

( الرئيس مبارك يهنىء الرئيس الاسرائيلي شيمون بيريز بمناسبة مرور ستون عاما على ذكرى قيام دولة اسرائيل ) ( !!!!!!! ) ..

على الفور قام عقلى بترجمة الخبر الى صيغته الأصح والأدق .. الرئيس مبارك يهنىء الرئيس الاسرائيلي لقدرته الفائقة على تصفية رموز المقاومة العربية خلال ستين عاما .. يهنئه هو و من معه ومن سبقه على مهارتهم الشديدة فى اخضاعه هو و امثاله من الرؤساء العرب الأذلاء لسيطرتهم كل هذه السنوات .. يهنئه على كل طفل فلسطيني تم ذبحه .. يهنئه على كل فتاة فلسطينية تم هتك عرضها .. يهنئه على كل شبر من أرضنا تم اغتصابه .. يهنئه على قتل عمرو .. و يتمنى له حظا أوفر فى الدول العربية القادمة !!

********************

علما بأن كل المواقف السابقة حدثت بالفعل و لم تكن من وحى الخيال .. فاسمحوا لى بحقى فى أن أخاف ..

كم أخاف أن ينشأ جيلا تم محو تاريخ نضال بلاده و ضرورة مقاومة الظلم و المطالبة بالحرية من ذاكرته ..

كم أخاف أن يصبح فكر التعايش و التعاون وما الى ذلك من ألفاظ ملتوية لا تدل سوى على الخضوع و بيع الشرف قاعدة و ليس استثناء ..

كم أخاف أن نظل راضين و مستكينين للأمر الواقع الذى صنعه لنا و ورطنا فيه حكام خانوا الأمانة و أجيال سبقتنا ارتضت على نفسها المهانة ..

كم أخاف أن يضيع دم عمرو ..

كم أخاف أن تذهب دموع أخته و لوعة أمه عليه هباء ..

كم أخاف أن أعيش لأرى بعد سنوات خبرا يقول ( الرئيس المصرى فلان يهنىء الرئيس الاسرائيلي علان بمناسبة مرور ( ... ) عاما على قيام دولة اسرائيل ) ..

ليس أفضل فى الختام من كلمات العظيم أمل دنقل :

لا تصالح .. و لو منحوك الذهب ..

لا تصالح على الدم حتى بدم !

لا تصالح و لو قيل رأس برأس !

أ كل الرؤوس سواء ؟

أ قلب الغريب كقلب أخيك ؟

أ عيناه عينا أخيك ؟

و هل تتساوى يد سيفها كان لك ..

بيد سيفها أثكلك ؟!

لا تصالح .. و لو قيل ما قيل من كلمات السلام ..

لا تصالح .. و لا تقتسم مع من قتلوك الطعام ..

لا تصالح .. لا تصالح ..

التاج الأول و الوحيد .. من أحلى مواجهات !

لما دخلت ع الايميل امبارح لقيت من ضمن الرسايل الاوفلاين رسالة من صديقتى العزيزة و أختى دعاء عمرو الشهيرة بدعاء مواجهات ( اه هى دعاء مواجهات بتاعت ضربة شمس ) بتقوللى فيها ادخل ع المدونه بتاعتى هتلاقى البوست الجديد فيه مفاجأه ليك .. انا قلت خير اللهم اجعله خير و قريت أية الكرسى خصوصا ان دعاء اساسا مطرقعه و يتخاف من المفاجأت بتاعتها دى .. سميت و دخلت ع المدونه برجلى اليمين و لقيت المفاجأة .. دعاء أهدتلى تاج يا جماعة .. التاج الأول و الوحيد و أظن هيكون الأخير اللى حد هيهديهولى .. بقيت مبسوط جدا ومنشكح ع الاخر وقلت كويس يا أسامة اهو فى حد لسه فاكرك و بيهديلك حاجه .. و كمان جاي مش من اى حد ده من دعاء ..

انا لقيت ان دى احلى مناسبه وأنسب فرصه انى اتكلم شويه بقى ونرغى مع بعض كده .. بداية احب اتكلم شويه عن دعاء مواجهات .. دعاء يا جماعة هى الأب الروحى للمدونة بتاعتى دى ( اه مشيها الأب ) .. دعاء هى اول حد شجعنى وقاللى انت لازم تعمل مدونة وتكتب .. دعاء هى اللى شجعتنى ابعت للدستور وادتنى ثقة فى كتاباتى وافكارى الى حد كبير .. دعاء الصريحة اللى مش بتعرف تجامل .. المنوفية الشرسة ( بتتغاظ هى اوى من حوار المنوفية ده .. لدرجة ان بقى عندها عنصرية مضادة خلاص ضد اى حد مش منوفى ! ) .. دعاء اللى ان شاء الله هتبقى صحفيه مهمة و قريب لانها موهوبة بجد ودماغها عالية فعلا .. دعاء اللى انا زعلتها منى قبل كده كذا مره بس مع ذلك بتسامحنى ( على اعتبار ان انا اخوها الصغير وكده وان مكنتش انا ازعلها مين هيزعلها يعنى ! ) .. شكرا يا دعاء على كل حاجة و يا رب نفضل اصدقاء على طول ومتزهقيش منى ..

ثانيا بقى .. انا لازم اشكر كل واحد دخل ع المدونة دى ولو حتى بالصدفة .. اشكر كل واحد دخل ولو مرة واحدة وألقى نظرة ع المدونة .. واشكر كل الناس اللى زى العسل اللى لو مكانوش شجعونى وكلمونى عن اللى بكتبه وقالولى ارائهم مكنتش هكمل اصلا .. سواء عجبهم او معجبهمش .. شايفينه كويس او وحش .. كفايه انهم اهتمو بيه اصلا .. بشكر محمد على (face off ) واحمد زكريا و البنهاوى و اتشو و الحسيني واحمد عبد المنعم وحمودى وتيتو .. بشكر رفعت و عبد المنعم ناصف و عطية عبد الباسط و احمد توفيق و محمود حجاب و محمد قمر و احمد حجاب و عبد العظيم و احمد زكى و مصطفى عطيه .. بشكر الساكو و محمد عادل و العكش و عاطف يحيي .. بشكر نودى و زلابيا و د. داليا ( أوركيدا ) و شهد و ندى و دنا و رودينا .. بشكر روناء و شمس و ساره و مونى و ريم .. بشكر غادة و رفيدة و علا بركات و سلمى .. بشكر نادين و دندونه و مارو و أمنية .. و يا رب مكونش نسيت أى حد .. بشكركو كلكو يا احلى اصدقاء فى الدنيا والمدونه دى على فكره بتاعتكو انتو .. وبشكر كمان اى حد دخل قرا و معلقش .. أو اى حد دخل علق و مقراش ( واخد بالك يا زكريا ! ) .. كل واحد قاللى كلمة تشجيع او حتى قاللى كلمة احباط ( أصل الاحباط ده بينفع لعلمكم برده .. بيخليني أعند اكتر ! ) ..

التاج بقى طبعا معاه سؤال .. ما هو دعاء لازم تسيبلى اسفين فى الموضوع .. بومبه جامده اوى بصراحه .. و سؤال اجبارى كمان يعنى لاااااااازم اجاوبه .. السؤال بيقول : انت ازاى ؟!! .. اتكلم عن نفسك فى 10 نقط .. اصعب سؤال حد ممكن يسأله لحد .. المشكله ان انا معرفش اللى انا هقوله عن نفسى ده فعلا فيا ولا لأ .. والله فعلا بتكلم جد .. ممكن اقول حاجات متكونش فيا خالص وانا فاكر انها فيا .. ومقولش حاجات هى فيا وانا معرفش .. وممكن اقول حاجات كانت موجوده وخلصت او حاجات بتروح وتيجي .. حد فاهم حاجه ؟ .. انا نفسى مش فاهم .. ما علينا ! .. انا هتوكل على الله واقول بس لو مكملوش عشره ماليش دعوه بقى يا دعاء .. وبرده متاخدوش على كلامى أوى ..

انا انسان مزاجى جدا .. بحب اخدم الناس اللى انا بحبهم بالذات .. متشائم الى حد ما مع ان ساعات بلاقى نفسى متفائل برده .. احيانا بكون متهور وساعات بكون خجول و جبان .. بتأثر بحاجات تبدو للبعض تافهة .. ساعات ببقى مهايبر ورتمى سريع وساعات تانيه ببقى ممل ورتيب ورتمى كئيب .. بحس ديما ان انا ماليش اى لازمه فى اى حاجه فى الدنيا .. بحب الهدوء وبحب اقعد مع نفسى كتير ( مع انى مبقتش بعرف اعمل كده خلاص ) .. و انا بقول كفايه اوى كده بقى يا جماعه مش لاقى حاجات تانيه اقولها دلوقتى .. وانتو بقى ابقو قولولى ايه رأيكم فى الكلام اللى انا كاتبه ده ..

واستغل بقى الفرصه واقوللكم يا ريت لو تقيمو المدونه كده من اولها و تقولولى ايه رأيكم فيها بوجه عام .. و شكرا اوى اوى ليكو كلكو و شكرا ليكي يا دعاء على احلى تاج من احلى صديقة ..

مبروك .. هتكمل تمانينك !!

اعذرنى هضيع من وقتك حبه بشعرى المسجوع

بس يا ريت تفهمنى وتسمع لمواطن مفقوع

أنا عارف .. شعرى هيبعتنى طريق و مالوهش رجوع

أصل انا مش مسنود ولا عندى شركات ليها فروع

بس انا غصبن عنى بلاقى لسانى داس فى الممنوع

ربنا بقى يسترها معانا ويكفينا كسر الكوع

مبروك .. هتكمل تمانينك و مقامك مرفوع

يمكن تعمل حفله كبيره وتجيب تورتايه وشموع

أو جايز هتجيب رقاصه ومعاها مطرب شخلوع

بس يا ترى هتكون مبسوط والناس بتموت م الجوع ؟

وهتضحك بسعاده وسرور والناس غرقانه فى دموع ؟

حل غموم و هموم الناس مش من ضمن المشروع ؟

لو ده حقيقي يبقى انا شايف قدامى _ لا مؤاخذه _ زالوع

بدعيلك من قلبى يا مصرى فى صلاتى وبخشوع

تخرج بقى من صمتك مره كفايه خضوع وخنوع

طول عمرك ساكت غلبان مذلول مضغوط مقموع

ديما كده تديها طناش وتسيب حقك مبلوع

لما تروح تطلب مصلحه يسيبوك سنتين ملطوع

واذا عرفت توصل طلبك يفضل فى الادراج مرزوع

مش هتقضى بقية عمرك عايش فى الوهم ومخدوع

يجيبوك ويودوك بمزاجهم رهن اشارة وتحت الطوع

اتكلم .. طالب بحقوقك .. اصرخ خللى الصوت مسموع

عن المحلة و أحمد و اللواء محمد عبد الفتاح .. فى ستين داهية !!

متميز هو حقا برنامج الحقيقة .. دائما ما يناقش مشكلات هامة و يفجر قضايا حساسة ويفتح ملفات شائكة .. مقدمه وائل الابراشى الاعلامى الناجح و الصحفى المرموق .. أسلوبه فى الحوار هادىء و واثق و غير مستفز .. يضغط على الألغام بقدم خبيرة و خطوات محسوبة و دون انفلات أعصاب و صخب حنجورى كغيره من مقدمى البرامج على شاشات الفضائيات ..

كنت جالسا أتابع الحلقة السابقة من البرنامج فى عصر ذلك اليوم .. كان موضوع الحلقة هو مقتل الفتى أحمد ( 14 عاما فى الصف الثالث الاعدادى ) فى أحداث المحلة برصاص قوات الأمن .. وكان ضيوف الحلقة هم والد أحمد وخاله وجارهم الذى شاهد ما حدث عيانا
و لواء شرطة كان وكيل مباحث أمن الدولة سابقا ..

لشدة دهشتى لم يكن أحمد كما توقعت مشاركا فى تلك الأحداث التخريبية المؤسفة التى حدثت فى المحلة السادس والسابع من ابريل الجارى .. وانما طبقا لما حكاه الأب وسط بكائه ونحيبه قتل أحمد وهو واقف فى شرفة منزله القابع فى الطابق الثالث .. قبل ذلك بدقائق كان يفعل شيئا ما على الكمبيوتر عندما طلب منه والده : " مش هتقوم تنام بقى يا احمد عشان عندك درس الصبح بدرى " .. وبالفعل قام أحمد ليخلد للنوم غير عالم أنه سينام للأبد .. دخل غرفته الموجود بها الشرفه المطله على أحد الشوارع الجانبية فى المحلة .. عندما سمع الأب صوت طلقات رصاص و صوت صراخ ابنه .. دخل غرفة أحمد ليجده جثة هامدة غارقة فى دمائها ..

بالطبع غريب جدا أن يقتل صبى صغير مسالم مثل أحمد لا يعرف أساسا معنى كلمة اضراب أو اعتصام او اى شىء من هذا القبيل وهو واقف فى شرفة منزله .. ولكن تفسير ما حدث كما قيل أن خروج أحمد_ لسوء حظه_ تزامن مع مطاردة كانت بين قوات الأمن وبعض مثيري الشغب الذين فضلوا الهروب فى ذلك الشارع الجانبى الضيق .. وبالطبع لم يتركهم الأمن فهرع ورائهم وأطلق عيارات نارية عشوائيا فى الهواء لتخويف المخربين وكان لرأس أحمد نصيب فى واحدة منهم ..

الحدث الأهم فى الحلقة كان مكالمة تليفونية من اللواء / محمد عبد الفتاح عمر وكيل لجنة الدفاع والأمن القومى بمجلس الشعب ( خد بالك والنبى كويس من اللقب ) .. سأله المذيع عن رأيه فيما حدث للشهيد أحمد .. فرد سيادة اللواء انه لا يجب الاسراف فى كلمة شهيد لأن من يثير الشغب ويعكر صفو الأمن القومى لوطنه ليس شهيدا .. يا عم اللوا الواد كان واقف فى بيته ومالوش دعوه بأى حاجه من اللى حصلت .. لأ برده سيادة اللوا شايف انه خساره فى الناس الغلابه دى حتى ان الحكومه تقول على ابنها انه شهيد ولو على سبيل المجاملة .. مستكتر عليهم الكلمة .. هو شايف ان بتوع الأمن بس اللى شهداء وان أى مواطن محلاوى بعد ذلك اليوم يجب أن يعامل كمذنب و ارهابى و خائن للوطن و متواطىء مع المخربين ..

قال له المذيع مصدوما مما قيل : " سيادة اللواء لو أن ابنك هو من قتل على يد ضابط أمن بدون ذنب و هو واقف فى شرفة منزله ماذا سيكون رد فعلك وماذا ستشعر وقتها ؟ " .. فرد اللواء ببرود دم أحسده عليه : " يروح فى ستين داهيه !! .. طالما هو معندوش ثقافة التصرف فى الأزمات وخرج فى الوقت ده و هو عارف اللى بيحصل فى مدينته يبقى يستحق ما حدث له !! " .. أقسم بالله أن هذا ما قيل حرفيا ..

يا خبر اسود !! .. سيادة اللوا شايف ان الواد يروح فى ستين داهية ويموت ولا يتدبح ولا يولع بجاز قال ايه عشان معندوش ثقافة التصرف فى الأزمات .. يا عم الحاج ده عيل فى تالته اعدادى .. ثقافة ايه يابا وتصرف مين وأزمات ايه بس اللى انت بتتكلم عليهم دول .. ما هو يا سيادة اللوا اللى بيتكلم مجنون والمستمع عاقل برده ..

الحقيقة سيادة اللواء قال يوميها شوية كلام زى الفل .. قال درر والله .. ده قال كمان انه من حق الأمن فى المواقف المماثلة للى حصل فى المحلة انه يطلق الرصاص عشوائيا .. يعنى يضرب فوق تحت .. يمين شمال .. يضرب راجل أو بنت أو طفل متفرقش .. كله يهون فى سبيل الدفاع عن الوطن !!

على فكرة اللى قال الكلام ده زى ما قلت قبل كده ( وكيل لجنة الدفاع والأمن القومى بمجلس الشعب ) .. والنبى ركزو معايا أوى فى الحته دى .. يعنى الراجل ده ممثل الحكومة المصرية فى الحاجات اللى زى دى و المتحدث بلسانها .. يعنى لما الراجل ده يقول الكلام ده يبقى كأن الحكومة قالته بالظبط .. والله لو الحكومة شايفه ان الراجل ده كلامه مش موزون أو مش تمام يبقى يا ريت تشيله .. انما طول ما هو فى مكانه و فى منصبه يبقى هو لسان الحكومة ..

طبعا بعدما سمع الأب كلام سيادة اللواء انطلق فى الصراخ والعويل و كاد أن يلطم خديه .. ابنه قتل بين يديه فى لحظة و الحكومة بتقولله ( فى ستين داهية ) .. انا نفسى كنت قاعد و دمى محروق .. يعنى ربنا يكون فى عون الأب اللى سمع الكلام ده وهو بالتأكيد يملك رأيا مختلف قليلا عن رأى سيادة اللواء و هو أنه يتمنى بالطبع أن يذهب محمد عبد الفتاح و حكومته و مجلس شعبه و وزارة داخليته وكل اللى مشغلينه فى تسعين داهيه ولا أن تمس شعره فى رأس ابنه ..

الأمر المستفز ايضا أن اللواء الجالس فى الاستوديو كان يحاول تبرير ما قاله زميله فى الهاتف بعد ما حس انه عك الدنيا و بوظ منظر الحكومة قدام الناس .. مبررات ساذجة بالطبع عندما يقول أن محمد عبد الفتاح مسئول عن كلامه وحده و أن هذا هو رأيه الشخصى .. أنا موافق أن هذا هو رأيه الشخصى و لكن فى حالة واحدة وهى أن تكون مهنته بياع طرشى و ليس فى هذا المنصب المرموق ..

الذى شعرت به من كل ما حدث و ما قيل خلال هذه الحلقة أن الحكومة أصبحت غير قادرة على الظهور بمظهرها الوديع والسمح بعد ما حدث فى المحلة .. الحكومة أظهرت الوجه الشرس القبيح الغاضب و لن يتغير ذلك بسهولة .. أصبحت الحكومة لا تبالى الان بما يقال عنها سواء من مواطنيها أو من تقارير حقوقية خارجية أو غيره .. حتى الشفقة والرحمة و الكلام الطيب اللى بيريح من باب الضحك ع الدقون لم تعد الحكومة على استعداد لمجرد قوله .. الكراهية أصبحت علنية والتحدى أصبح سافرا .. فلتذهب الحكمة والهدوء والعقلانية الى الجحيم بعدما جرؤ اولئك الغوغاء على كسر هيبتنا و تشتيت قوانا ..

كل ما أريد قوله أنه ربنا يسترها ع الايام الجايه عشان اللعب بقى ع المكشوف أوى سواء من الحكومة ولا من المعارضة و المواضيع وصلت لطريق مسدود .. لا أحد يريد بالطبع تكرار ما حدث فى المحلة ولا نريد ما حدث لأحمد أن يحدث ثانية .. ولكن أخشى أن الحكومة ستعتبر أى تعبير ولو كان سلميا عن الرأى هو اخلال للأمن القومى واثارة للاضطرابات وبالتالى ستكون ردود الأفعال عنيفة وخصوصا أن هناك دعوة أخرى للاضراب فى 4 مايو القادم عيد ميلاد الرئيس .. أعتقد أن التهنئة قد تكون مختلفة قليلا هذا العام !

انتخابات المحليات .. حلو كده يا مدحت ؟!

جرت منذ أيام قليلة انتخابات المجالس المحلية .. مهزلة بكل المقاييس .. باختصار هى انتخابات يديرها الأمن المركزى .. محظور على الاخوان والمستقلين وأحزاب المعارضة الترشح فيها .. يعنى لو مكنتش حزب وطنى يبقى متحاولش ..

الحزب الوطنى تعامل معها كأنها معركة حربية .. يجب أن أفوز بكل المقاعد .. لو فاز اخوانجى لعين بمقعد واحد فلتحل لعنة الله على الأرض و لتنشق السماء و تعصف الأعاصير و تزأر الرعود و ليذهب الجميع الى الجحيم !!

يتسائل الجميع ( طب كل ده على ايه يعنى ؟! ) .. هل عضو المجلس المحلى يملك هذه السلطة التى أدت الى كل هذه الحروب و النعرات و المشاحنات ؟

الحقيقة أن عضو المجلس المحلى بالماضى كان يملك الحق فى استجواب المحافظ شخصيا وقتما يشاء .. ولكن فى ظل الديمقراطية التى نعيشها فى عصر الرئيس مبارك تم تقليص صلاحياته كثيرا أو نزعها بالكامل .. ما هو مش كل شويه بقى هيضايق المحافظ والناس العسل اللى معاه .. خلى كل واحد يعرف حدوده .. وهكذا لم يعد يملك العضو شيئا سوى الاجتماع فى المجلس والدردشة مع زملائه وشرب الشاى وقرائة الصحف الحكومية وسب الاخوان والمعارضة أعداء الوطن ومدح حكمة الرئيس مبارك وبعد نظره !!

بالطبع يرى الحزب الوطنى أن ما حدث من منع للمرشحين المعارضين وقمع للحريات كان ضروريا .. لسببين .. الأول : لازم الطريق يكون متجهز ومفروش بالورود للنجل عشان انتخابات رئيس الجمهورية الجايه .. ما هو من ضمن الشروط التعجيزية ان اللى هيترشح للرئاسة لازم يجيب موافقات عدد من أعضاء المحليات عشان يقدر يترشح .. ولو الاخوان مثلا كسبو مقاعد بعدد كبير ممكن واحد اخوانجى يترشح ضد النجل وياخد الرئاسة منه .. الثانى : ان المجالس المحلية هى مصب كل الفلوس اللى جايه للمدينة .. الفلوس اللى المفروض تكون مرصودة لرصف الطرق ومد شبكات الصرف الصحى _ لا مؤاخذه _ وتوصيل الكهرباء والمياه لكافة قطاعات المدينة ..كله بييجي للمجلس المحلى وبعدين يتوزع .. واخد بالك انت من يتوزع دى ..

طبعا التوزيع بيبقى على حاجات تانيه وبمقاييس تانيه خالص .. حسب علاقة كل عضو برئيس المجلس وقدرته على هبش أكبر نسبة يكون التوزيع ..

سأروى لكم موقفا أقسم أنه حدث بشهادة شهود عيان .. أعرف شخصا يدعى ( مدحت ) فى الثلاثينات من عمره .. والده عضو فى المجلس المحلى عن الحزب الوطنى فى مدينتنا .. فى كشافات نور كبيره بتيجي للمجلس عشان تتوزع فى الشوارع الضلمه والطرق المهمة عشان الناس تشوف قدامها وميحصلش حوادث ومشاكل .. مدحت بقى ساكن فى شارع مش مهم خالص ومنور كمان .. بس هو اسم النبى حارسه حس خير اللهم اجعله خير ان الاضاءة فى الشارع مش قد كده وان _بعد الشرعليك يا تيحه _ عنيه ممكن توجعه ونظره كده هيضعف .. فقال لابوه يا بابا انا عايز كشاف عندنا فى الشارع ويا ريت يبقى قدام البيت على طول !!

وفعلا .. جاء العمال لتثبيت الكشاف وبدأو فى شغلهم .. والحاج أبو مدحت كان واقف معاهم .. ايه رأيك كده يا حبيبي ؟ حلو كده يا مدحت ولا نجيبه يمين شويه ؟ .. لأ سنه شمال يا بابا .. أييييييوه اشطه كده .. ربنا يخليك لينا يا سيد الكل ويخليلنا الحزب الوطنى !!

طبعا لو تواجد عضوا معارضا وسط كل أعضاء الحزب الوطنى هيبقى عامل زى العمل الردى بالظبط .. قاعدلهم بقى ع الواحده .. لن يصمت وهو يري كل هذا الفساد والاختلاس حتى ولو بدافع الفضيحة من أجل الفضيحة وتشويه صورة الحزب الوطنى أمام الجميع ( قال يعنى هى ناقصه تشويه ) .. وبالتالى فالحزب الوطنى فى غنى عن كل هذه المشاكل ووجع القلب .. عايزين نشتغل بمزاج !!

وأستطيع أن أرى الأن بعين الخيال أب أخر يخاطب ابنه : ايه رأيك كده يا حبيبي ؟ .. ذلينا أنفاس الاخوان والمعارضة الوحشين ومخليناش ولا واحد فيهم يترشح اهو عشان انتخابات الرئاسه الجايه محدش فيهم يضايقك .. حلو كده يا جيمي ؟!

حملة حماية .. خليك عدد صحيح !!

لما كنت قاعد بتفرج على برنامج الجنة فى بيوتنا وشفت عمرو خالد بيعلن ان فى حملة اسمها حملة حماية لمكافحة الادمان والمخدرات حسيت ان الموضوع مش هزار .. وحسيت بشكل ما ان الحملة دى هتنجح وهتجيب نتايج ايجابية مع انها كانت لسه مبدأتش .. وحسيت كمان ان انا نفسى ابقى معاهم واعمل حاجه للموضوع ده ..

كنت مستصعب الموضوع .. كنت بقول لنفسى يا أسامة ما جمعية صناع الحياة موجودة بقالها سنين وانت عمرك ما فكرت حتى تسأل هى فين .. جاى دلوقتى وعايز تعمل فيها مصلح اجتماعى .. يا شيخ اتلهى !!

وفضلت الافكار دى مكسلانى اسبوع .. وخلص اول اسبوع اللى كان المهمة الاساسية فيه لزق مليون استيكر عن الحملة .. ومع بداية الاسبوع التانى اتغلبت ع الافكار المحبطة دى وسألت عن مقر الجمعية ورحتها وقلتلهم هناك انا جايلكم ابيض ونفسى اعمل اى حاجه تفيد الحملة دى .. قابلت هناك شخصيات محترمة جدا وناس زى العسل ورحبو بيا وكلمونى عن الحملة و فهمونى النظام ..

وانا مروح اول يوم من الجمعية حسيت بالتوهان .. حسيت ان انا صغير اوى وماليش لزمه .. حسيت بالتضاؤل جنب الناس دى .. الناس اللى بقالها سنتين وتلاته شغالين فى العمل العام وبيعملو اعمال خير وحاجات ايجابيه وانا نايم فى مية البطيخ .. كنت زعلان ومخنوق وقلت انا مهما عملت مش هاجى جنب الناس دى حاجه ..

يوم ورا التانى اتصاحبت عليهم .. فهمت اكتر نظام الشغل .. قالولى فى لجان كتير وانت اشتغل فى اللجنة اللى تحبها .. كان فى لجنة المدارس ولجنة الجامعة .. بس انا اخترت لجنة العشوائيات .. المناطق التعبانة والعشش الصفيح والناس الغلابة واكتر حتت تظهر فيها مشكلة الادمان بشكل مفيهوش تزويق ..

وبدأنا الشغل .. ونزلت مناطق عشوائية كتير فى طنطا .. وكلمنا الناس ودخلنا بيوتهم .. الناس الغلابة اللى قهرها الفقر والجهل وقلة الرعاية الصحية وانعدام الاهتمام من حكومتنا المبجلة وكأن الناس دى مدخلتش اساسا فى تعداد السكان .. الناس البسيطة اللى بتتبسط وتفرح وترقص لما تديهم هدايا بسيطه او تشارك فى صنع فرحة ليهم .. ساعتها بيبقو ناقص يشيلوك فوق دماغهم ..

الحمد لله استريحت جدا فى شغل العشوائيات رغم انه اكتر شغل متعب من كل النواحى .. والحمد لله وصلنا حالات كتير لمراكز العلاج .. وسمعت خبر بسطنى جدا هو ان الكول سنتر اتصل بالجمعية وقاللهم ان عدد الحالات اللى بتتصل من محافظة الغربية كتير جدا ..

يوم ورا التانى فى الشغل حسيت ان ليا وجود .. حسيت ان ليا قيمة مع كل الشباب اللى معايا .. اتصاحبت عليهم وفهمنا بعض وطلعت بصداقات مع شخصيات مش هلاقى زيهم كتير .. حتى المناطق اللى كنا بننزلها وبنتكلم فيها طلعت منها بصداقات كتير وعلاقات والناس فى اغلبها كان عندها قابلية جدا انها تسمع وتفهم وتتصل كمان ..

انا عايز اقوللكو ان الحملة لسه باقيلها اسبوعين .. اللى يقدر يعمل حاجه يا ريت يعملها .. اى حاجه مهما كان شايفها بسيطة ممكن توصل لحاجه كبيرة .. الزقو استيكرات على قد ما تقدرو وكلمو الناس فى شارعكو او فى كليتكو او قرايبكو .. ابعتو ايميلات وجوابات للمسئولين فى مدنكم ومحافظاتكم عشان نطلب منهم ان المساجين المدمنين يتعالجو جوا السجون وصيغة الخطاب موجودة على موقع عمرو خالد http://www.amrkhaled.net/

عايز اقوللكو ان الحمد لله الحملة عملت نتايج مبهرة .. المليون استيكر بقو تلاته ونص مليون لحد دلوقتى .. ال 5000 نشاط بقو تلاتين الف وشويه .. ال 5000 مدمن اللى عايزينهم يوصلو مراكز العلاج وصل منهم لحد دلوقتى اربعتلاف ونص ولسه باقى اسبوعين ع الحملة يعنى ان شاء الله هيعدو الخمستلاف .. شاركو معانا فى الحملة .. اعمل حاجه تكون فى ميزان حسناتك ان شاء الله وتحسسك انك عدد صحيح مش صفر ..

لما سنكرت فى وش برهومة !!

ترررررررررررررررررررررن !!
كان هذا هو صوت المنبه القابع على الكومود المجاور لفراش برهومة .. فبرهومة حريص على الاستيقاظ مبكرا حيث أن عمله اليومى يبدأ فى تمام الثامنة صباحا ..
طاك .. طاك .. بووم !!
كانت هذه يد برهومة الغاضبة وهى تحاول العثور على المنبه لكى تخرس صوت الجرس المزعج ..
_ يا نهار مش فايت .. الساعة بقت تمانية الا عشره .. المنبه الخربان ده انا هرميه فى الشارع .. ده انا ظابطه على سبعه وربع ..
وهب من الفراش مذعورا .. غسل وجهه على عجل وارتدى ثيابه بهرجلة مسروعة فبدا منظره مضحكا وقد تدلى نصف القميص خارج السروال .. ثم التقط مفتاح سيارته ال 128 الوثيرة التى حصل عليها بالتقسيط عن طريق خصم جزء من مرتبه .. وانطلق وهو لا يكف عن سب ولعن المنبه ..
امتطى مقعد القيادة .. وأدار مفتاح السيارة ..
كرررررررررررررك !!
كانت هذه من السيارة والمحرك يعلن أنه لن يدور بهذه البساطة ..
_ يا فتاح يا عليم يا رزاق يا كريم .. الساعة بقت تمانية وربع وكمان العربيه مش عاوزه تتحرك .. ارحمنى يا رب !!
وخرج من السيارة باحثا عن أى كائن بشرى .. فوجد رجلين يبدو عليهما القوة وطلب منهما : زقة والنبى يا رجاله معانا .. فأقبل الرجلان يتأففان ولسان حالهما يقول : ( يا عم هى نقصاك انت وعربيتك ع الصبح ) ..
ورغم كل المحاولات المستميتة والدفع المخلص الا أن السيارة أثبتت بحق أنها صاحبة مبدأ .. مش هدور النهارده .. انسانى يا برهومة ..
_ شدو حيلكو شوية يا رجاله .. قربنا نوصل اهو .. باقى بتاع تمانيه كيلو بس ع البنك ..
_ نهار أبوك أزرق !! .. نعم يا خويا ؟! .. احنا هنوصلك لحد شغلك زق ولا ايه يا ........
وانطلق لساناهما بعبارات لا أستطيع ذكرها ها هنا للأسف .. ثم وجد برهومة نفسه وحيدا ..
_ طب اعمل ايه انا دلوقتى فى الورطة دى ؟ .. يادى المصيبة دى الساعة بقت تسعه الا ربع .. أنا اخد الاتوبيس بقى وأمرى لله ..
ووقف فى انتظار اتوبيس 97 .. فى القاهرة قاعدة معروفة .. قف لتنتظر أتوبيس بعينه وابقى قابلنى لو جه .. هتلاقى كل الاتوبيسات اللى رايحه كل الحتت التانيه انما اللى انت عايزه موت يا حمار ..فتظاهر برهومة انه مش عايز أتوبيس 97 فجاء على الفور !!
طبعا لم يجد مقعدا خاليا فى الاتوبيس .. بالضبط وجد موضعا ليقف فيه على قدم واحده .. خنقته رائحة العرق والأنفاس الملتهبة المنطلقة بحماس فى قفاه والتى مصدرها الرجل الواقف خلفه .. كاد ينفجر فى البكاء عندما نظر الى الساعة فوجدها التاسعة والربع ..
_ أيوة هنا يا اسطى .. والسائق لا يسمع شيئا أو هو يتظاهر بذلك ..
_ يا اسطى هنا يا اسطى .. يا عم نزلنى هنا .. يابا اقف هنااااااااااااااااااااااا !!
_ يا عم ما كنت تقول م الصبح بدل ما تنعر فى خلقتى كده .. هو انا شغال عندك .. أما ركاب عرة صحيح .. يفضل نايم طول الطريق وبعدين يقرفنا احنا ..
ابتلع برهومة الاهانة لأن الوقت لا يسمح بالشجار .. وخرج ملفوظا من الاتوبيس ومظهره وثيابه فى حالة مخزية .. ثم دخل الى عمله ..
_ المدير عايزك فى مكتبه يا أستاذ برهومة .. قالتها تفيدة زميلته وهى تغمز بعينها وتبتسم ابتسامة خبيثة ..
اتجه الى مكتب المدير وهو يبسمل ويحوقل .. ودعا الله ألا تتبعثر كرامته أمام جميع الموظفين ..
_ جررررررررررررر !! .. الساعة عشرة ؟! .. جايلى الساعة عشرة يا أستاذ ؟! .. طب ايه اللى جابك .. ما كنت تقعد فى بيتكم احسن .. مخصوم منك خمس ايام يا حبيبي .. وابقى اتأخر تانى ..
هو يوم باين من أوله .. قالها برهومة لنفسه .. أهى كده كملت بقى .. هنشحت الشهر الجاى ..
ثم اكتشف أنه هيشحت باقى الشهر ده كمان عندما تحسس جيبه فلم يجد حافظة نقوده ..
_ يا نهار اسود ومنيل بنيله كحلى .. المحفظة اتنشلت !!
واسودت الدنيا أمام عينيه .. هى مالها مقفلة ليه كده يا ربى .. سنكرت فى وشى بالضبة والمفتاح .. هروح اقول لابويا ايه بس .. اعتبرنى تلميذ تانى واديني مصروفى الشهر ده ..
قضى ساعات العمل شارد الذهن .. ولم تكن رحلة عودته من العمل أفضل حالا من رحلة ذهابه اليه .. فقد اضطر انه يستلف خمسه جنيه يروح بيهم من الشبوكشى زميله فى العمل ..
دخل بيته .. وتنهد من أعماق قلبه وهو يلقى بجسده على أريكته المفضلة .. ودفن وجهه بين يديه .. ثم سمع صوتا قادما من المطبخ ..
اتجه اليه ليجد أمه توليه ظهرها منهمكة فى طهى طعام الغداء ..
_ انتى لسه زعلانة منى يا أمى ؟
نظرت له أمه نظرة معاتبة .. ثم أشاحت بوجهها عنه ..
_ هو اللى عملته امبارح ده شويه يا برهومة ؟ .. بقى تعلى صوتك عليا يا ابني .. انت متعرفش ده أثر فيا ازاى يا برهومة .. ودمعت عيناها الحانيتان المتعبتان ..
_ ما انا خلاص عرفت يا أمى .. عرفت قد ايه انا زعلتك .. بس بطريقة عملية وقاسية حبتين ..
وحكى لها ما حدث له طيلة اليوم .. ثم انحنى ليلثم يديها ..
_ سامحيني يا أمى .. مكنتش اقصد ازعلك أبدا ..
ربتت على كتفه فى حنان فطرى .. وقالت له فى حب :
_ مسامحاك يا حبيبي .. مهما حصل منك هتفضل ابنى اللى ماليش غيره فى الدنيا ..
وابتسم برهومة عالما أن الغد سيكون أفضل حالا بالتأكيد من اليوم ..

الطفل المعجزة .. يا مواطن انسى مشاكلك !!

كنت مستيقظا فى تلك الساعة المبكرة من صباح ذلك اليوم أتابع التلفاز .. عندما بدأ " لحسن حظى طبعا " البرنامج العبقرى (صباح الخير) فى القناة الاولى على التليفزيون المصرى .. ولشدة ندمى قررت مشاهدة أجزاء منه .. يعنى قلت اشوف الناس دول عايزين يوصلولنا ايه برده .. وفور انتهاء تتر البرنامج طالعنا على الشاشة وجه المذيعة وقد ملأته ابتسامة مشرقة .. وتلاعبت فى عينيها نظرة ضحوك متفائلة .. ثم أعلنت وبقلب جامد : " يا جماعة .. مصر لسه بخير !! " .. وأكملت : " لسه الامانى ممكنة .. حتى مع ارتفاع الأسعار كل يوم عن التانى ومع ازدياد معدلات البطالة ومع تدهور مستوى الصحة والتعليم .. لسه فى أمل !! " ...
لا شعوريا انتقل لى جزء من تفاؤلها وقررت اركز بكل حواسى فى شاشة التليفزيون منتظرا سماع هذا الخبر الذى أشاع كل هذا الأمل والتفاؤل فى نفس هذه المذيعة ومن حولها فى الاستوديو .. متوقعا خبر مثل : ( استقالة حكومة نظيف ) أو ( مبارك يقيل حكومة نظيف نظرا لتدهور الحالة الاقتصادية للبلاد والاجتماعية لمواطنى البلاد ) أو ( الرئيس مبارك قرر التنحى عن حكم البلاد واقامة انتخابات حرة نزيهه ) أو ( السر الالهى طلع !! ) .. ما انا قلت مش معقول يعنى التفاؤل ده كله سببه خبر أقل من الاخبار دى فى الظروف المنيله بنيله اللى احنا عايشين فيها ...
ثم خابت كل امالى وانهارت كل احلامى حين سمعت الخبر : " سيدة مصرية اكتشفت ان معدل ذكاء طفلها الذى لم يتجاوز العاشرة تتعدى نسبة الذكاء الطبيعي !! " .. لا والله ؟!! .. بجد والنبى ؟!! هو ده الخبر اللى خلاكى تحلى كل مشاكل مصر وانتى قاعده كده .. لا فعلا
معاكى حق .. ده انا حتى اتبسطت خالص اهو .. نياهاهاهاهاهاهاااااااااا ...
أعلم تماما أن الخبر جيد برغم كل شيء .. طفل مصرى عبقرى .. شىء رائع وجميل ويدعو للتفاؤل حقا .. ولكن ألا تروا معى أن هناك بعض المبالغة فى أن نجعل اكتشاف مثل هذا الطفل هو حجة تريد بها الحكومة جعلنا ننسى كل اللى عايشين فيه من مصايب وبلاوى وفقر وقلة حيله ؟ .. أعتقد أن هذه هى المبالغة بعينها .. ان لم يكن استفزاز لعقلية المشاهد الغلبان الكادح الذى يفكر كيف سيكمل بقية الشهر والمرتب خلصان من يوم عشره .. تغييب لعقول المشاهدين ومحاولة ساذجة لتوجيه الرأى العام تجاه اى سراب يشع بالأمل فى سبيل افقاد المجتمع المنهك ذاكرته الملأى بالجروح والمعاناه ..
اعلام الحكومة أصبح يطبق حرفيا المثل القائل : " يعمل من الحبة قبة " ..أمن المفترض على الشاب خريج الجامعة العاطل الجالس ع القهوة أو المريض فى المستشفى الحكومى الذى لا يلقى اى نوع من الرعايه الصحيه الادميه أو الموظف الغلبان الكادح اللى واقف فى اتوبيس اربعتاشر رجليه مش لامسه ارضية الاتوبيس من الزحمة انهم اول ما يسمعو الخبر ده يرقصو طربا وفرحا بهذا الانجاز المصرى الفخيم ؟!! .. هيييييييييييييييه عندنا طفل معجزة .. كل مشاكلنا اتحلت يا رجاله ...
بالفعل هو خبر جميل .. ولكن فى بلد مثل مصر يصبح خبرا تراجيديا .. اذ يمكن بقليل من فراسة أن نتصور ما سيحدث لهذا الطفل وغيره الكثير من أطفال مصر الأذكياء .. كل يوم يمر على هذا الطفل فى المدرسة سوف يقلل من معدل ذكائه ويضع برأسه أفكارا بالية ومعلومات خاطئة عاف عليها الزمن .. كل دقيقة تمر عليه وهو يشاهد اعلام حكومته سوف تطفىء ضوئا فى عقله .. كل مشكلة مادية سوف تواجه والديه فى ظروف الغلاء التى نحياها سوف تكسر بداخله شعاع أمل لتخبو عبقريته يوما بعد يوم .. وليتحول الخبر الجميل الى حسرات غير معلنة !!
فى النهاية أريد القول بأنه من الافضل وضع الامور فى حجمها الطبيعي .. كفايه يا تليفزيون الحكومة وجرايدها ضحك ع الناس .. كفايه تضليل للرأى العام .. كفاية استفزاز للناس الغلابه .. اتقو الله فى دماغ الناس وفى طريقة مخاطبتهم عبر تليفزيونكم الملاكى .. وربنا يسترها ع الواد ويكفيه شر الحسد !!

.....................................

نشر فى جريدة الدستور .. نشر فى مجلة بص و طل الالكترونية .. http://www.boswtol.com/5gadd/nsahsah_226_05.html

عندما ذهب اليقين

عندما ذهب اليقين ...
لم أدر الى أين ارتحل ...
ألقيت قلبى فى الوحل ...
عندها بدأ الحنين ...
و اهتز قلبى فى وجل ...
و سرحت فى شعر الغزل ...
اه يا قلبى ما العمل ...
والشبل فى جوف العرين ...
*****
عندما ذهب اليقين ...
أحسست بحلمى وقد ضاع ...

و رثيتك قلبى الملتاع ...

فلأبحر من دون شراع ...

و لأبقى فى التيه سنين ...

احساس الغدر وقد شاع ...

فى قلبى من دون قناع ...

قد صنع من الحب قلاع ...

يرهبها القلب المسكين ...

*****

عندما ذهب اليقين ...

استشعرت دماء سالت ...

من جرح كرامة قد زالت ...

أفكار سوداء جالت ...

فى عقلى فسمعت أنين ...

و مشاعر قاسية هالت ...

أتربة فى القلب ومالت ...

تطعن احساسى ولا زالت ...

تقتلنى و أرجوها اللين ...

الحزب الوطنى فى مصلحتك !!

الحزب الوطنى فى مصلحتك والمستقبل ليك

حريصين يا مواطن على راحتك وعلى مزاج معاليك

بس انت تصهين وتطنش وتخليها عليك

متصدقش جرايد غيرنا لحسن يسرحو بيك

دول ناس مش حابينك خالص ودى كلها تلاكيك

يا مواطن خليك ويانا الهى ربنا يهديك

الحزب الوطنى فى مصلحتك والمستقبل ليك

لجنة سياساته يا جمالها لجنة لذيذه وشيك

اوعاك تسأل عن لزمتها وفى حالك خليك

لو عاوز تنضم تعالى وهنعرف نحميك

هننسيك العيش الناشف والناس الصعاليك

وتدوق بقى م التوست بتاعنا وحمامنا أبو فريك

الحزب الوطنى فى مصلحتك والمستقبل ليك

مش عندنا لا فساد ولا سرقة ولا رشاوى وتسليك

ولا عز دخيله فى حديدها مالهاش اى شريك

ولا أكياس الدم دى بايظه وبلاش بقى تشكيك

والناس مبسوطه ولو كنت مكدبنا نوريك

وبلدنا نضيفه ومغسوله بصابونتين وفنيك

ده الحزب الوطنى فى مصلحتك والمستقبل ليك

عن الحب فى عيد الحب

لا أعلم يقينا متى بدأ حبها يعتمل فى قلبى ...
ربما بدأت أحبها حين أدركت كيانى و أدركت كيانها ...
ربما أول أن رأت عيناى الدنيا ... وربما حتى قبل أن أولد ...
ولا أعلم أيضا يقينا لماذا أحببتها ...
أ أحببتها لأنها فى بعض الأحيان كانت تعطيني كل ما أحتاجه من احساس بالدفء والأمان والحب ...
اذن لماذا أحببتها أيضا حينما كانت تبخل على بكل شىء ... حتى بواجباتها المفترضة نحوى ...
لا أدرى ... ولكنى متأكد من شىء واحد ... أننى ذبت فيها عشقا و حتى النخاع ...
أحيانا كنت أشعر أنها تحبنى أضعاف حبى لها ... وكثيرا ما كنت أشعر أنها لا تبادلنى أدنى شعور بالحب ...
أذكر فى تلك الفترة السوداء عندما زاد بيننا الجفاء ... شعرت بأنها لا تطيق مجرد بقائى معها ...
هى أيضا لم تعطنى أى فرصة أرى من خلالها امكانية قبول البقاء والاستمرار معها ...
وفى نهاية الأمر ... طردتنى ...
طردتنى من حياتها ومن مكانى داخل قلبها ...
لا أعلم حقا هل هى من طردتنى أم أنا من فررت من جفائها وقسوتها معى ...
كنت أعتقد أننى كرهتها ... كرهتها لأنها ظلمتنى ... لأنها لم تعطنى فرصة للبقاء معها وبدون سبب واضح ...
ولكنى كنت يوما بعد يوم أكتشف أنى لم أستطع أن اكرهها ...
بل والأدهى أننى لا زلت أحبها ... كانت هذه هى الحقيقة التى لم أندهش لها ...
هو داء القلب المزمن ... هو ألم النفس الممتع ...
اكتشفت أننى لا زلت أحبها حين كنت أبكى شوقا لها ...
حين كنت أغضب وأثور حين أسمع أى كلمة تقال عنها غير لائقة بها ...
حين كنت أرقص فرحا لسماع أى أخبار طيبة عنها ...
عشت كثيرا بعيدا عنها ... ولكنى الان _والان فقط_ أشعر أن قلبى يتمزق ...
لم أعد أحتمل ... أشعر برغبة عارمة فى العودة اليها ...
أعرف أنها بمجرد أن ترانى ستعانقنى فى حب ودفء برغم كل البعد والجفاء فى كل السنوات السابقة ...
مهما قست على أو ظلمتنى بعد ذلك ... سأرضى بذلك وأقبل ... فقد علمت أن نارها أفضل كثيرا من جنة غيرها ...
فلأبقى معها اذن الى الأبد ... فلأعيش معها ولأموت من أجل حبها ...
وبالفعل اتخذت القرار ... قرار عودتى اليها ...
عودتى الى مصر ...